هيَّ حاجات بسيطة لكن
ف الحقيقة كتير بتفرق..
زي مثلا
بُص ليها وقل لها
النهاردة انتِ غير
انتِ أصلًا وش خير
حاسس انك زي طير
نسمة روحك صبح صافي..
لو لقيت في عينيها خوف
قل لها طبعًا باحبك
قل لها أنا جنب قلبك
قل لها عمري وحياتي
روحي برضه وقلبي ملكك
قل لها غيرك ماليش
والحياة من بعد منك
اه حبيبتي ماتساويش
قل لها انتِ الحكاية
والبداية والنهاية
واني في عيونك باعيش..
قل لها..
حلوة تسريحتك قوي
والقوام مظبوط قوي
قل لها خاسة النهاردة
انتِ عودك زي وردة
لسة مقطوفة وندِيّة
هات لها أبسط هدية
هات لها شوكولاتة مثلا
هات حرانكش
أو كيسين غزل البنات
بوست فيه شعر لنزار
نُكتتين وقت الهزار
كلمتين ع الوتس منك
أو إشارة لغنوة حلوة
قل لها كم أنتِ حلوة
كل حال وف أي حال
لو هتسأل 100 سؤال
الإجابة تكون باحبك
ضمها ترقص في حضنك
احكي ليها ع الأماني
قل لها عنواني حضنك
انتِ م الآخر كياني
قل لها لساكِ طفلة
وبإيديك اعمل ضفيرة
قل لها انتِ الأميرة
وكن لها الشاطر حسن
قل لها أنا بيكِ باقوى
كن لها ضهر وسند
أوعى لحظة عليها تقوى
سيبها جواك تتفرد
سيبها تسكن جوه روحك
اوعى تقلِق يوم راحتها
تبكي هي تزيد جروحك
والفرح يحلى بسيرتها
انتبه لكلامها كلُه
باهتمام اسمع لها
لو هتحكي العمر كله
اوعى يعني تصدها
وانت خارج قل لها
موت حبيبتي هتوحشيني
واما ترجع قل لها
انتِ مالية عليَّ عيني
هيَّ حاجات بسيطة لكن
في الحقيقة كتير بتفرق
زي مثلاً
تصبحي على خير
وصباح الخير
واطمن دايمًا على حالها..
أخبارك إيه
وأجيب لِك ايه
وتملي تملي تقولها لها
وياريت تفاجئها بطقم جديد
ان شالله يكون م العيد للعيد
وخروجة وقعدة على الكورنيش
ترمس أو درا واتهنى وعيش
وامسك إيدها وتبِّت فيها
الحزن مابينكم مايعديش
