أحمد خالد السباعى
السَّرَّاقة إيَّاك وايّاها
أحلام اليقظة
على قد ما تبدو جميلة
مُتْعَة
بِتْبَخَّر ضَنْك الليلة
على قد ما حتمًا
هَتْلُوشْ بإْدِيها اللحظة
واللحظة
ومفيش ولا ريشة
هتخفّ عليك فى الشيلة
فالدنيا
بعيونها الجاحظة هَتِفْضَلْ جاحظة
مِشَ تِحْظى نهائى بنظرة تصون
مش ترضى بقلبك غير مسجون
مش ترضى تكون
وتكون
وتكون
وهترفض بالتأكيد رفضك
وهترفض عصيانك طبعًا
وهترضى تخون
يمكن هتشوفها فْ حضنك…
البنت الأبعد من أقطاب الكون
يمكن هتشوفها بتِوْزِن…
البلد اللى اختل ميزانها
وأصابها جنون
يمكن هتقابل صاحبك…
الغايب بإرادة الموت
لكن صدقنى
أول ما يهزّك صوت
وتفوق
وتلاقى العتمة بْتِطْبَق على أحلى شروق
هتحس برعشة
هتحس بوحشة
هتموت من توق بيقابله الطوق
وسنين يمكن هتعدى
وأنت بْتِتْمَشى
رجليك على تحت
وعنيك على فوق
هايم فى الأحلام إيَّاها.
أحلام اليقظة
أحلام اليقظة
على قد ما تبدو لطيفة وناعمة
على قد ما فيها شراسة وْغلظة
على قد ما تبدو رقيقة وْهادية
على قد ما هى تقيلة وْفَظَّة
ﻓ ايّاك وايّاها
أحلام اليقظة.
أيدولوجيا القلب
ولسه قلبى ف مَطْرَحه
حاجات كتير بتفرحه
حاجات كتير ملهاش عدد:
ضحكة فقير
شَبْعِة جعان
رحمة أجير…
بدموع حصان
ود الجيران…
بالابتسامة يصبَّحوا
حاجات كتير بتفرحه:
نَكْش الصُّحاب
ع الماتش من بعد الرهان
لازم تملّى يقَبَّحوا
عُشّاق على
حافة جنان
ع المستحيل بِيْلَقَّحوا
سُكَّر بيجرى
فى اللسان
لو مَسّ زهر يفتحه
حاجات كتير بتفرحه:
شارد لقى الأربع حيطان
عاطل لقى الدكان أمان
عازف هداه حظه بكَمان
طفل وْأبوهْ بِيْمَرْجَحه
حاجات كتير بتفرحه..
عوم العيال فوق الزبد
نَبْتَة وفراشةْ
فى الهَدَد
كِسوة فتاة
كسوة ولد
أيتام بلا… ضهر وسند
كان نفسهم يِتْفَسَّحوا
ولسه قلبى فْ مطرحه
حاجات كتير بتفرحه
حاجات كتير ملهاش عدد:
عودة مهاجر للبلد
بلد بِيِفْتَح للنسيم كل البيبان
صرخة دراويش بالمَدَد
ترنيمة بِتْلِفّ الأدان
ورد الشذى بِيْفَوَّحه
ولسه قلبى ف مطرحه
صحيح حزين
وحزنه دايمًا يِفْضَحُه
وكروب دميمة بْتِدْبَحه
أشواك لعينة بْتِجْرَحه
لكنه لسه بْمَلْمَحُه
ولسه برضه ف مطرحه
حاجات كتير بتفرحه
أَوِّلْها والله الحَنان…
الهوى هوانٌ
ممر أخير
قبل المونتاج
