عشمان أمل
يجى النهار المحتمل
يفرد شموسه ع القلوب
اللى اختفى منها الحنان
ترجع أمان زى البخور
وتبخر الطفل الوليد
من عين حسود
وتمد جسور الليل دفا
وتلغى أسلاك الحدود
وان الوطن يصبح وطن
ما يموت شهيد
ساعة غروب ضوء القمر
اللى اختفى قبل الميعاد
عشمان كمان يعزف كمان
لحن الحياة اللى اتنسى
جوه الممات
والنسمة تيجى بعطرها
تفتح بيبان الحب
اللى قفلها فكرنا كره وغياب
وان العرب يتوحدوا
يرجع قمرهم فى السما
من غير عتاب
ويعيد كتابة التاريخ
بلا انهزام
أو دمعة بتبكى الحجر
قبل الشجر
ع اللى انهدر أو راح قوام
ولا ضياع يعلن ضياع
قِبْلِة دماغ كارهة الصلا
خلف الإمام
ولا تتوه البوصلة في عرض المحن
من غير عيون ممكن تشوف
الضعف فين والقوة فين
والكرسى فين اللى بِعِد
واللى جحد حتى النخاع
لابس قناع الزيف حَمَلْ
ولما جه وقت العمل
طار القناع
فليه أقول عشمان أمل
وهى ماتت ع الأمل
تلقى النهار المحتمل
والنخوة راكبة ع الفرس
تحمى البلاد
تحمى العباد
اللى فى أرضي اتنسوا
واتقسموا جوه الشتات
ولما ظلوا فى العراء
شربوا دماهم الضباع
