«مافيش علاقة مؤكدة» قصيدة للشاعر سامح هريدي

مافيش علاقة مؤكدة

ما بين القهوه وصوت فيروز ..

أو بين كتابة الشعر

والقعده ع الكورنيش ..

مافيش علاقة بين بوكيه الورد

وبين رغيف العيش ..

 مافيش علاقة موكدة بيني وبينها

يكش ان ممكن اكون حقيقي

بحب عينيها ..

عينيها بس ..

وساعات بحس

إني محتاج إني اشوفها

بتشدني..

ويشدني أوقات كسوفها ..

ونظرة بتفسر لي خوفها ..

مافيش علاقة بين فرح جوه الضلوع

وبين وجودها..

أو بين ملامح حزنها أوقات غيابي ..

مافيش علاقة بين نَفسها

وبين حاجات ساكنة ف دولابي ..

أو بين دخولها ف القصايد

أو حتى احتلالها لكتابي ..

ما فيش علاقة مؤكدة

تربطني بيها

رغم إني يمكن أغير عليها..

لكن ده برضه يعدي عادي

من باب عادات أهل الصعيد..

مفيش علاقة بين وريد

من قلبي واصل قلبها..

وبين حنينها لكل سكة مشينا فيها..

مفيش حقيقة مؤكدة

تقول بأني هاموت عليها..

ايه يعني لما أشتاق لها

وأغير كمان من أي شئ ينظر لها

واحسد جميع مستلزماتها

كل الحاجات اللي ف أوضتها

برفانها وهدومها وصيغتها

مرايتها لما بتتكسف

لحظة وقوفها عندها

الحافظه تفاصيل حُسنها

العارفة كل الأمنيات

كل حكايات بتقولها ليها تُسرها

وفي قلب بير بتحطها

وان حد يوم يسألها عني

تقول مفيش أبداً علاقه

بين حد داب من غير كلام

وبين عيون تلك الماها

أنا قولتها

وبقولها تاني

مفيش علاقة بين سماع تلك الأغاني

وبين حضورها ف الخيال ..

أو بين صورتها اللي خلاص

بقى أصحبت  رمز الجمال..

وبين ملامحي

واحتلال صورتي لعينيها ..

أو بين وجودها ف كل أحلامي الجميلة

وبين حياتي اللي تملي بشوفها فيها

مافيش علاقة مؤكدة

تربطني بيها