النوم على شط الوجع |إلى روح الدكتور محمد أبو دومة

صبيت كلامى ع الورق سيل وانطلق..

صمت ونطق وكلام كتير

 شهق وزفير صرخ ونفير

على حلم مجنون وانتحر
نزل المطر
حباته بتبوس البيبان
وتبل أجساد العتب 
الموت غلب 
واللى اتكتب 
لحظه وعدت كالسحاب 
حتى اللى غاب 
ساب الوجع..
نايم على شطه ضباب
سرح السراب..
جوا شوارع قلب متوضى بضيا ..
وعاد للتراب
والشعر مواله اتحرق
قلم الأديب فجأه اتسرق
وقفت سواقى الروح..
ومات ف الغصن أحلام الورق
وكل اللى فاضل من تفاصيل الجبين 
حبة عرق
فسلام عليك 
وعليك تراتيل السلام 
وسلام إليك 
يا سيد السادة الكرام.