الولاد

صفا عزت صيام

إلغي له جون
إكسر جناحُه
اللي فاكر نفسه بيه
حايطِير صحيح..
لَجِّم جنون
حِلمه الصَّريح..
إزاي يِفَكَّر أو يقرَّر
بيك يِطيح؟
دا انت المَلِك
دا انت اللي تستاهل
تِلِّف الزَّمْبَلِك
دا انت اللي لازم في النهاية
يصقفوا لك
ويطاطوا لك
والحناجر ليك تصيح
إزاي يِجرأ عَزمُه ع الأسياد؟
لُه عين كَمَان يرفع عَلَم؟
ويقول بصوت مسموع ويعلنها بعِناد؟
ويهز بوز رجليه قوانين العباد؟
إزاي يِرَقَّص (مِيسِّي) ويهز العروش؟
إزاي يِدَخَّل جُون/جُونين
فِ شْبَاك ما تعرفش الحصاد؟
إزاي يِلُوش كل الوشوش
اللي ملاها الزيف سنين؟
إزاي ولاد،
جامدين شُداد،
بيغَيَّروا وَجْه البلاد،
وبيرسموا قلب الوطن،
على كل ذرة من البَدَن؟
إزاي فَتَن هيثم قلوب كل المِحَن؟
إزاي صلاح يوصل بكل الاجتهاد؟
إزاي تِكَسَّر عزم زيكو، ويغلبك
ويجيبها جون تاني ويقدر يِفحمك،
وتسيبه يوم يفرح بِكاس؟
دا الكاس بتاعك فوق رقاب الناس..
كَسِّبتُهُم؟
إرتحت دلوقتي وخلاص؟
طب عاوزة اقول لك: مكسبك دا راح فاشوش
وان الفراعنة فازوا حتى رغم أنفك
رغم (VAR)ك والجيوش
وان كان ضروري تعتذر
إبقى اعتذر لولاد ولادك
عن فضيحة تزلزلك
مكتوب عليها بخط إيدك/بَصمِتك:
مصر أصلاً
بالمروءة
كِسْبِتَك..