مراد ناجح عزيز
ضفيرة طيّرها الهوا ما فيش مرّه صدّقتِك وطلعت صح ما فيش مرّه كدّبتِك وقلبى ما خاصمنيش ماعرفش ليه دايمًا كده وبحلّف روحى ع السّفر وتسيبنى عَنْدك ونس غلبان وتْبل ريقه الحياة
لو بس شافك..
ضفيرة طيّرها الهوا
وبالعِند سابها..
تكتب بداية الجنّة من لمسة ايديكِ
ماعرفش ليه دايمًا كده
مُصاب بداء الكِدب على روحى
واقول قدرت أهجرك
كل يوم ساعة
وانا بابعت روحى تتطمّن عليكِ
كل دقيقة والتّانية
وأى حد يقوللى بطّل
ألومُه
علشان يبطّل يلومنة
وانا بجرى ألمّ ف خطوتك
فدّانين أحلام
ووطن فيه حاجه منّى.
ندَّاهـــة قمر
جناح الطّير ف الرفرفة..
ذكرى قديمة
قررت ان ده الوقت المناسب
لابتسامة
كان ليها فضل كبير
ف تغيير الاتّجاه
فكبرت
وبيقت بخاف قلبى يحب
ويبقى طير..
يصاحب الشبابيك
والبلكونات
والجناين
والشّجر
وتاخده ندَّاهة قمر
يتوه ف الليالى ودوّامة السّنين
وبدال ما يزيدوا الحبايب واحد
يقلّوا الطيّبين.
ما جاتش فُرصة
ما جاتشِ فُرصة/ الليل ..
يعيد اكتشاف نفسه فـ عنيكِ ..
مدينة للألعاب
وسحر الطفولة
والأحلام
واللى طيّروا الطيارات ف السما
ودكّوا البيوت
دموعهم يبقى لها صوت
وما تنامشى
ما جاتشِ فُرصة
عشان اعتذر للجناين
واقول:
مشغول بجنينة تانية
وانا ماسك ورده وناحل وبرها
وبفسّر الإشارات ما بينّا
بتحبّنى
لأ
ما بتحبّنيش
ما جاتش فُرصة ومش جاية
يبقى لى غيرك وطن
وسلاح
وجيش.
موجة بحر مش جاية
على كتفى ليل
وف رجلى شوكة
وف قلبى موجة بحر
مش جاية
وف كل خطوة السّكة
بتقصّر
واقول قرّبت
من أوّل نقطة
ولآخر بيت ف القصيدة
كنت برتاح تحت ضلّه
سايق الحنان أنغام
لروحها
والهوا سلطان
غُربة سنين العمر
بتودّعه
واستنى الرّاديو ف القهوة
وأغانى (الِّست)
واللى مشيوا ف طريق الحب
وماقدروش يرجعوا.
طالع سلِّمتين بينهج
زى ضحكة صغيّرة
وشعرها شاب
قتلها الخوف م الناس
ف أول مقابلة
زى ضيف تقيل على قعدة صُحاب
قضّى الليلة وحيد
ودمعته على خدّه
زى ضى ضعيف ف أوضة ضلمة
شِبع م السّواد تلطيش
ونام ع الكنبة لحد الصّبح
أنا الحزين
الغريب
الضّعيف
اللى حطّوا على كتافه شِيلة
طالع سلّمين بينهج
وبرضه بيكمّل
وبيحلم.
بعنيكِ ف الغِنوة
وخطوِتك أناشيد
أو يحدفنى عيّل م الشبّاك.
قبل دق الجرس
أحيِّى مرَّة ف حياتى العلم
من غير مواعيد\
العودة لـ«الجبل السحرى»
الطبيعة السرية لأشياء هذا العالم
فى مديح إعادة القراءة
