قومى غيرى الجلابية اللى انتى لابساها واللى كنتى بيها فى المطبخ لحسن ريحة السرير والأوضة بقت كلها ملوخية بالمرقة كمان وحتى من غير أرانب!
انجى انجى ؟
حرام عليك ياعلى سيبنى أنام شوية عايز إيه؟!
قومى لو سمحتى كفاية نوم انتى نايمة من العصر و المغرب قرب خلاص !
يا على أنا ماصدقت الحكومة بطلت تقطع الكهرباء فى الوقت ده وانت عارف أنا بحب نومة العصرية قد إيه بعد هدت حيلى فى الطبخ والمسح والغسيل.
بلاش تقطيم فيا، أنا ماخدعتكيش يا إنجى وقلتلك لما كنا لسه ع البر إنى مش هاقدر أجيبلك خدم وطباخين وسفرجية زى اللى موجودين فى قصر باباكى الباشا وساعتها كنتى بتقوليلى أنا كل أملى أكون معاك تحت سقف واحد وانا اللى هطبخلك بايدى وأغسلك وكمان هحطلك رجلك فى ميه دافيه وملح لما ترجع تعبان من الشغل!
كنت هبلة وحمارة كمان،،ارتحت خلاص،لو سمحت سيبنى أنام بقي!
ياه يا إنجى للدرجة دي،،نسيتى احنا عانينا قد ايه علشان نكون لبعض ولولا الثورة اللى ساوت بين الغنى والفقير مكنش ممكن نتجوز؟! نسيتى رخامة أخوكى البرنس علاء معايا وتقطيمه ليا كل شوية؟ نسيتى لما الباشا أبوكى طلب لأبويا الريس عبد الواحد الجناينى السرايا الصفرا علشان إتجرأ واتقدمله يطلب إيدك ليا؟
أبويا الباشا كان غلطان ياعلى وكان المفروض يطلبلى أنا السرايا الصفرا يمكن كنت عقلت وفوقت من المراهقة اللى خلتنى بعد ما كنت هانم حواليا ألف بيخدمونى بقيت زى مانت شايف خدامة ليك ولولادك ومع ذلك عمرى ما عايرتك وفضلت ساكته وكل اللى بطلبه تسيبنى أنام لكن انت مصمم كل شوية تكرر الأسطوانة المشروخة دي،ها هتسيبنى أنام بقى ولا لسه عندك كلام؟
طب ع الأقل قومى غيرى الجلابية اللى انتى لابساها واللى كنتى بيها فى المطبخ لحسن ريحة السرير والأوضة بقت كلها ملوخية بالمرقة كمان وحتى من غير أرانب! أو على الأقل قومى حطى بيرفيوم !!
اللهم طولك ياروح،هو انت ياعلى جاى تصحينى تجر شكلي،أرانب إيه وفراخ إيه، لأ وكمان عايزنى أحط بيرفيوم ومش بعيد نفسك أحط روج كمان !
وليه لأ يا إنجي؟
لأ لمليون سبب يا علي،أولا على رأى المثل قال اطبخى يا يا جارية يا إنجى كلّف يا سيدى علي.ثانياً ياراجل احنا كبرنا ومعدناش صغيرين للكلام الفارغ ده،ثالثاً الأفلام حاجة والواقع حاجة تانية وانت كل يوم ٢٣ يوليو تتفرج على فيلم رد قلبى وتتخيل انك على إبن الريس عبد الواحد الجناينى وانى أنا الأميرة إنجى وتيجى تطلّع الفيلم عليا
مش فاهم عايزة تقولى إيه يا إنجي؟!
عايزة أقولك إن مش معنى إن اسمك على وإن اسمى إنجى نبقى احنا أبطال رد قلبى !
يعنى إنتى مش الأميرة إنجي؟!
لا ياعلى أنا إنجى جارتك واللى اتقدمتلها وهى رضيت بيك!
ولا أخوكى الرخم علاء هو البرنس علاء؟
لا ياعلى أخويا علاء مش برنس ولا حاجة ده سواق تاكسى أبيض بيشتغل عليه طول النهار والليل وحتى معندوش وقت يرخم عليك فيه!
ولا أنا على يا ويكا ابن الريس عبد الواحد الجنايني؟
لا يا على انت على الموظف الحكومى ابن جارنا المحترم الاستاذ عبد العزيز !
يعنى أنا ماصادرتش الدهب بتاعك ؟
لا أهى دى بالذات عملتها يا على بعد شهرين من جوازنا أخدت شبكتى بعتها عشان تسدد ديونك بس أنا اديتهالك عن طيب خاطر ومش زعلانة!
يعنى أنا جئتُ لا أعلمُ من أينَ ولكنى أتيتُ ؟!
لااااااه دى حالتك صعبة أوى ياعلي، انت كده نقلت من فيلم رد قلبى وقلبت على فيلم الخطايا، روح بقى يابن الحلال إسأل حماتى السؤال ده وسيبنى أبوس إيدك أكمل نومى !
خدعة المونديال!!
«العمارة» فى حماية «الأغنية»
لا إفادة فى الإعادة
