ماهر مهران.. قلبي كولدير

١
نوارة البادنجان الفوشية الجميلة
اللى ماهداهاش حبيب لحبيبته فى مرة..
حزنت، ومن كتر أحزانها التقيلة
بقيت يا عينى
قلب غرقان ف السواد و السمرة!
٢
مفيش غيوم، ومفيش مطر
ولا لعب ع المركز التالت..
كنا نفوس من نور 
لكنها يئست وخابت..
واتقلبت ضحكتها دمعة
وأحلامها للأسف شاخت وشابت..
٣
وأنا اللى من كتر الرغبة ف التغيير
ب ادى صوتى لناس
عارف ومتأكد إنهم ساقطين..
وأنا اللى من كتر حبى للأحلام
بقيت بأخلق أجنحة
وأطيرها لفوق زى المهفوفين!
٤
كل واحد بيجر النار على قرصه..
كل واحد بيحاول يحرس نفسه..
كل واحد أمله إنه مايخسرش
ف ماتخافش من عدو على أرض مبهورة
 بيحاول يبنى ويعلى ف عرشه!
٥
مع إنى من البشر طويلة التيلة..
لكن كل خطواتى كانت نيلة..
كل أحلامى جات بالعكس
فلاح حصاده عكس الغرس
خيال وخيله هاوى الرفص
وكل ما اداوى الوجع
ما أعرفش ليه ب تميل الشيلة؟!
٦
ماتتماداش ف الشر
وماتفتحش ع الآخر بابه..
وبلاش تقسى على خصمك
وتقلع له نابه..
دا يمكن بكره تعوزه 
ويمكن بكره تحتاجه..
٧
الهمس أحسن من الصراخ..
واللمس خلا البطل داخ..
والرقة فتحت لى كل باب مقفول
خلتنى أتهنا بالجنة، وأرتاح..
٨
قلبى كولدير اتحط ف الشارع 
على ذمة واحد مظلوم..
حوالين قبره الحمام بيحوم..
منه يرتوى العطشان
ومنه ترش العيال 
على بعضها مطر وغيوم..
وبعدها يمشوا
 من غير ما يقروا الفاتحة
أو حتى يدعوا دعوة للمرحوم..
٩
اللى مات فوق جبل عرفات
وكان النور فى الوش شارة..
مش زى اللى مات 
سكران طحينة، وقالع الخلقات
فى بيت دعارة!
١٠
زرعت زرعة محبة
فى أرض مليانة كراهة..
قلت المحبة تداوى
أى حاجة سواها..
ويا دوبك حبة حبة
ضاعت يا ناس المحبة 
وضعت أنا معاها!
١١
مش مصدقه ليه إنى بأعشقك
أكتر من عشق الفراشات لنوار البرتكان؟!
وانتى اللى لما زرتينى ف الحلم ثانية
عوضتينى عن مية سنة حرمان؟! 
١٢
عشان بتحب
بقيت تدبح..
طب لو بتكره
 هاتعمل إيه؟!
١٣
صوتى ضايع ولَّا واصل؟
طب إحنا ع الهوا ولَّا فى فاصل؟
طب انحيازنا لضى الرُّوح 
ولَّا لملى الحواصل؟
طب الكائن اللى يشبهنا..
ممكن يخطِّى لقُدَّام إزاى
وهوَّ أصلًا عاجز 
عن فهم اللى حاصل؟!
١٤
قلت لحكيم الحكما :
المية فين؟
بص أبعد من الحلم 
وقال:
فى الحتّة اللى فيها 
القرادين متجمعين!
١٥
ماتبصليش 
على إنِّى قِلّه..
داالتوكتوك 
بيمشى جنب التِّرلّة!
١٦
لو ضغطوا 
على الـ كارُّو..
أكيد الملاكى 
هايتضرُّوا!  
١٧
حبّ يجيب جون، وماجابش
ضربوه العيال، وشبع لطش
غافلهم تانى، وشاط الكورة..
ضاعت الكورة، وخسرنا الماتش!
١٨
أنا عقرب ثوانى نازل لف
غنوة ف كاسيت عمره ماسف
فلاح نجاح راضى بنفسه
ونيل بيفيض مش بير، وجف..
١٩
لا عندى كورة ولا ملاعب
ولا مشروع فينا يلاعب
فيه كوسة وسرقة ومتاعب
ونجم قاعد ع الدكة
وأبو واسطة راس حربة لاعب
وعشمانين نفوز بالكاس؟! 
٢٠
تنكت سلاحك ف الأرض
تديك زهرة شبابها..
تسيبها، وتنام على جنب
تكويك بنارها، ولهبها!
٢١
درويش وواقف بين شجر تعبان
باشا قدام مساكين بيقصقصوا الأغصان
أنا والله أحب صورتى وسط الغيطان
أكتر من صورتى فى حديقة الأورمان..
٢٢
اللى بيكره، بيكره حتى الغنا
وبيشابط الفراشات، وبينطح الصخر ..
ف ياللى مش طايق عمَّك هنا
إزاى بتدوُّر على عَمْ غرب البحر؟!