أيا غزة ..
كل عام..
وأنتِ أجمل م اللي قبلُه
وأنتِ أقوى من اللي قبلُه
وأنتِ قلبك رغم جرحُه
لسه مليان بالحنين
لسه فيه شجر الزيتون
والحمام متجمعين
لسه ضحكة نور عينيكِ
طارحة فل على الجبين
رغم إنك في الحصار
رغم حالة الانكسار
إلا اني باشوف في روحك
بكرة جاي بالانتصار
لسة برضه وردة نادية
وأنتِ متحواطة بدمار
صامدة لسة ولافة شالك
عارفة مين في الجرح شالك
م اللي قال الحزن حالك
ده انتِ حالك كله خير
انتِ وحدك بس حرة
والجميع أصلا أسير
كل عام وانتِ يا غزة
رافضة لحظة تسلِّمي
كل يوم بتعلِّمي
الجميع معني الكرامة
كل يوم بتكملِّي
رحلة العِزة بسلامة
صابرة راضية ومؤمنة
إن بعد العسر يسر
وان أي مقاومة لازم
في النهاية هتبقى نصر
وان وعد الله حقيقة
وان أولادك جريئة
قلبهم زي الحديد
كل عام وانتِ ياغزة
أحلى فرحة لأحلى عيد
