«يا واد اجمد».. قصيدة للشاعر سامح هريدي

 ولا تهابِش ..ولا تخافِش..

ولا يهمك..

 من اللى فى ضهرك اتكلم ..

ده لو راجل

مكانش قصادك اتبلم ..

معلم.. فعلك الطيب

وحارق خُبث أفعاله

كلامه.. مِاته بيأثر ..

إزاز خايب

قُصاد سيرتك بيتكسر ..

ويتحسر..

 عشان شايفك يا واد ناجح

وحلمك كالحصان طايح

ودايس غِل أحقاده

ف لازم تبقى مُستهدف

يا واد انشف

وصد الريح بطرف عينيك..

كتير اللمَّه من حواليك

بتشبه زفة كدابة..

يا واقف فى الميدان وحدك..

لا عزوة بتسند الشيبة

لا مال بتداري بيه .. عيبة

يا فارس والسلاح كلمة

تقولها فى وش أي جبان..

وايه يعني ان صاحبك خان

أكيد يا ابني ما هوش صاحبك

ده كان للمصلحة مصاحبك

وكَل وياك.. عشان جعَّان..

ما كانش يا ولدي عيش وملح

ف دوس ع الجرح

وشد العود بعزه وفخر ..

عشان خاين

بينهش جِتتك غِيبة..

فا عادي يا ولدي ميهمكش ..

وميهزكش..

طبيعي الشجرة لو تطرح

هتتحدف يا واد بالطوب..

ف خلي .. صفحته السودة

تِعبي ذنوب..

ولملم روحك الطاهرة

عن المعيوب ..

بناقص يعني لو ناقص

ليه  تعتب ..ع الخسيس وتلوم

مدام الدنيا دوَّارة

هيبقى لكل واحد يوم

وكمل سكتك بالخير

وخلي خطوتك بضمير

وأمرك فوضه لله

ومتفكرش يا ابني كتير