ظلت يسرا أشرف، ذات الـ٢٢ عامًا لما يقرب من 14 عامًا حبيسة الجدران.. لا تقوى على الحركة والتعامل مع الناس.. شلل دماغى اجتاح جسدها منذ الطفولة.. استطاعت من خلال فن «الجلاكسى» أن تتحدى إعاقتها.. لتغزو بإبداعاتها معبرة عن الفضاء ما يحمله من عوالم خفية.
تقول يسرا لـ«الأخبار»: عندى حاجه اسمها شلل دماغى ديستونيا حركة لا إرادية جاتلى إثر سخنية داخلية وفقد الحركة والنطق ومكنتش بتحرك لمدة ١٤ سنة، لكن الحمد لله ابتديت امشى واتكلم كان عندى ١٥ سنة بدأت ارسم من وانا ٧ سنين كنت بربط القلم بايدى عشان مكنتش متحكمة امسكه وارسم بيه كنت برسم شخبطه لحد ما اختارت نوع رسم اسمه «جلاكسى» رسم حر عبارة عن فضاء وكواكب ونجوم ومجرات.
وتضيف يسرا: حصلت على الشهادة الإعدادية عنيت كتير عشان اكمل تعليمي ورحت مدارس كتير واترفضت بسبب حالتى الصحية وبعدها استطاع أحد الأشخاص أن يوصلنى بعميد كلية فنون جميلة دكتور أشرف رضا وأعطانى منحة فى الكلية مرة فى قسم تصوير والسنادى فى جرافيك وعاملة دراسات حرة فى علم النفس أيضا.
وتؤكد كان والدى الله يرحمه دايما بيشجعنى ومعايا دايماً والدتى ربنا يبارك فيها دايما بتشجعنى، ونفسى اعمل معرض باسمى اوى وحلمى اقابل سيادة الرئيس عبدالفتاح السيسى وبتمنى أشارك فى منتدى شباب العالم.
