مبروك بطلات مصر

بعثة مصر فى أوليمبياد طوكيو وصلت لـ 56 بنتا مشاركة فى الرياضات المختلفة، وحققن فوز بعدد ست ميداليات، منهم واحدة ذهبية للبطلة فريال أشرف فى الكاراتيه واللى قدرت تحوز على احترام وتقدير كل المصريين لأنها حققت لنا انتصار جديد بيأكد مهارة البنات المصريات، وكمان فازت جيانا فاروق وهداية ملاك بميداليتين برونزيتين، وكمان أخد أحمد الجندى فضية وسيف عيسى، محمد كيشو برونزيتين ويبقى دا رصيدنا من الميداليات. الحقيقة اللى بقف عندها طبعا جنب سعادتنا كلنا إن بلدنا تحقق إنجازات ونجاحات،هى الأم المصرية اللى تعبت كتير وضحت بوقت طويل وإجهاد غير عادى علشان تعلم وتودى تمارين وتتابع وترجع تأكل وتشرب وتساعد وتدعم، دى الأم المصرية اللى تستاهل تبقى دايما تاج ع الراس، دى الست اللى سعادتها هى نجاح أولادها وتميزهم، دى الست اللى بحق وحقيقى. وطبعا ماننساش لو فى أب ساعد ودعم نقوله ربنا يبارك فيك لأنك نعم الأب القدوة اللى تستحق ولاده يشرفوه. 
وعلشان نتأكد إن النجاح منظومة واللى بيحققه فى حاجة بيقدر يحققه فى كل حاجة،هنلاقى بناتنا الحلوات متفوقات طبيبات صيدلنيات ، وهداية مهندسة ديكور،بجد اللى بيذوق طعم النجاح ميعرفش يعيش من غيره،عايزين نفرح بولادنا ونعلمهم ونديهم فرصة يثبتوا نفسهم ويقدموا لنا نموذج يحتذى به،البنات الحلوة دى مش أول مرة تفوز فى مسابقة دولية!! لا بالعكس حققوا كتير وجابوا ميداليات ورفعوا اسم مصر. والأهم إن سيادة الرئيس فرحان بولاده وطبعا الفرحة الأكبر بالذهبية اللى أسعدتنا بيها فريال وعلشان كدا هناها مش بس كدا، لكن كمان احتفالاً بالفوز القيم هيخلى اسمها على واحد من المحاور الجديدة علشان كل اللى يمشى فى المكان دا يفتكر النماذج المشرفة، وطبعاً دى رسالة من الدولة لتقدير بناتها، وكمان نقول أد إيه الرياضة مهمة وولادنا بخير. مبروك عليك يا مصر بطلاتك.