وقف الحمام
مرصوص على الصفين ..
مستنين لحظة وصول النعش
وقف الحمام مكسور بقلب حزين ..
نازف دموع على حلم راح ما رجعش
مين اللي كان قالهم
طب يعني عِرفوا منين
هو الحمام كان شاف النعي في الجرانين
أو عِرفوا اسمك لما نادي المُنادي عليك
ولا عشان من شهر
ماكانتش ريحتك عِطر
ف قلب مياتهم
ولا جوه غلاتهم..
ولا سمعوا صوتك ونس ساعة ملاغتهم
عرف منين الحمام ان اللي جاي روحك
رغم ان كان العزا مش قبلة لسطوحك
ناح الحمام بالقوي
ف قلبي زاد نوحه
مبقاش بِبُعدك قوي
م أنت ف (هواك روحه)
أخر تلات ورقات
كان مفترض إنهم
جاهزين لنص جديد
وحاجات لزوم العيد
مش إعلانات للنعي
آخر طريق للسعي
كان لأجل زرعة خير ناقصها ضحكة ري
أخر عيون لمحوك ما شافوش وداع إنما
كان قلبهم مخطوف..
آخر كلام معروف نطقته بلسانك
كان هو عنوانك من جوه ملامحهم
مش كنت طول العمر عمال تفرحهم
ما تقولي جالك قلب دلوقتي بس أزاي
إنك تجرحهم ..
عمال بلمك حكاوي من قلب أحبابك
وبجمعك سيرة أرويها للي ما شاف
سأل الحمام عنك
مستني لجوابك
انا قلبي كان هايرد
لكن لاقته خاف
ل يزعلوا م الرد
يتحولوا لنسور
أصل الحمام معذور
متربي علي ايدك
وانت اللي داق طبطبة من كف ايدك صعب
هايصدق انه إتحرم من حضنها تاني
كل اللي قبلك صدفه واقف وبيعاني
ف بلاش تلومني عشان دمعي اللي نازل سيل
عز النهار بقى ليل عتمة بغياب القمر
ضهر الجبل بيميل بقى محنى بعد الخبر
القبر لما إتحفر ضحك بصوت عالي
فرحان قوي ومبسوط لانه هايضمك
يا نن عين أمك يا قلبها المفطور
وقف الحمام في طابور
ياخد عزا نفسه
مين اللي ها يحسه
بعد أما هتفارق
لمح الحبيبة هناك
في ايديها فستانها
مستنظره ضحكتك من تاني تسكنها
كسرتها لأنها كات سانده روحها عليك
كات عايشة أصلاً بيك
كات شايفه كل الجاي من قلب نن عينيك
آخر ما كتبت ليك
وحشتني جدا ..
آخر ما كتبت فيك
مات كل شئ فيا ..
وقف الحمام مرصوص علي قلبك الغيّة
يبكي عليك إنما كان دمعه ف عينيا
بحسن سير وسلوك
سبق الخبر أسمك ..
وف قلب مين حبوك
حفر الوجع رسمك ..
رحل اللي عاش جنبنا
عشان يعيش جوانا ..
رحل اللي شال همنا
وساب جراح قتلانا..
رحل اللي مش هايغيب
لو حتي يحصل ايه..
رحل اللي خلي حياتنا
دستور هانمشي عليه ..
وقف الحمام مرصوص
مذهول من الصدمة
لما لاقك قدامه
واقف وبتعزية ..
