مين قالك إنك مقهور
أو إنك غرقان في بحور
دا الحق أكيد دايما راجع
والليل لو طال لازما طالع
فجر النور
صبر نفسك وراودها
لو ملت طبطب هدهدها
والروح الطاهره في تكونها
بتسلم أوجاعها لسيدها
الدنيا زي الحدايه
ما بتعرف ألوانها الجايه
والتوهه الساكنه في أربيزها
بتعافر وتلاطم فيك
خليك متهاود وياها
وتصاحب ويا اللى عداها
أحسبها وفي ساعة الزنقة
راح تعرف مين اللى شاريك
اتغندر ودخل في اللوحه
كل الشاخبيط هنا مسموحه
ألوان الخلق بقت زحمه
والشاطر يعرف تفاصيلها
بروزها طراطيش أفعال
مصنوع من طين الصلصال
متشكل بإدين الخلق
والطيبه لمت عزاويلها
یا مسافر جوه الإنسان
إكتب عن رحلة عمرك
أرخها واختر عنوان
ترجعله من تاني في سفرك
الخلق زي البراويز
حاضنه كل الأشكال
راح تلقى جواها عزیز
وتقابلك كل الألوان
