«وماعرفتش أجيب عنوان» قصيدة للشاعر أحمد السراج

«وماعرفتش أجيب عنوان» قصيدة للشاعر أحمد السراج

يجوز كلمة بتوحشني ..

بـ تعمل للقا جناحين

عزيزتي انتي أول نور

بيخلق للسما معنى

ويجعل للحياة تفاصيل

ركبت دماغي آه وعديت

لكنك كنتي أول بيت

مااحبش كنتي أو كنا

لإنك حاضرة طول الوقت

وح ارجع تاني لدماغي

وأنزل منها لو ساعة

واقول يا رب لو ينفع

تسيبها ف قلب بستانها ..

ولو يارب حابب يعني لقياها

أكيد خالق في قلبي الصبر والأشواق

وخالق نسبة الأشواق ..

أكيد أعلى

حرام يارب أستعلى

واقول الصبر مش مفتاح فرج خالص

وإن القلب من غيرها اتقفل خالص

أنا ..

ابن القلوب اللي اتقلىٰ فيها الحنان في الزيت

ومش أول ماتيجي الفكرة بـاستنى في أول بيت

يجوز يارب أترجاك ..

تسيبها تعدي أيامها كأي ملاك

واكون يارب انا السابق ..

وهي اللي ح تلحقني

ماتِفْرِقشي

مابارثيش العدم فيها

ولا بارثي الوجود المُر

مافيش ولا حد بــيقارن ..

حنان الأم بكتابها

أنا توبها اللي مش مبلول ..

وانا التاجر

أنا سلِّمت بالكفين ..

على المكتوب

لكني يارب مش قادر