الشرخ إن علم فى الصورة
بدرت علام ع السبورة
المجد صنعته فى أجيال
عشت التجربة وانا منصوره
سلاحي عصاية من الجنه
أفكاري فى الراس ملت الكراس
والشعر اهو شاب غطيته حنه
والعلم دا تاج رافعاه ع الراس
من بعد مناهده ومهاتيه
وفيت الخدمه اللي عليا
هقعد وارتاح بقى يا حلولي
العمر الجاي هيكون ليا
أخرتها معاش كام جوز ملطوش
ما يكفوا القوت ولا ستر هدوم
من غير البركه ما بيكفوش
الصحة كفايه يا رب تدوم
وعلام الواد وجواز البت
طلبات البيت وكمان الست
وسنين بترقّص فينا ع التت
ولحد الآن والله ما عشت
فطارنا الفول والطعميه
وبيحسدوا فينا على منظرنا
لا فرحنا بقرش ولا ماهيه
واللمة الحلوه تصبرنا
ومديري همام بيقدرني
أضحك وأقوله بقى عيوني
وف نفس اللحظة يكدرني
وتلامذه كمان هيشلوني
ومديري خلاص مش هيدرني
هشرب وهبلبط حريه وكفايه ملام
اشرح في ظروفي وجوبات ما يقدرني
هعزف سلامات .. آه يا صاحبي سلام
العمر اتسرسب من إيدي وكأنه فلاش
اخترت وظيفة في لحظة طيش
اهتفوا رددوا والله معاش
هنوني يا ناس أنا لسه هعيش
اللحمة طبيخي عليها دمعه
بالصحبه تملي هنعمل عيد
وايامي السبعه تكون جمعه
هنام وهقوم من غير مواعيد
وها حج واروح عمرة رمضان
وهزمزم روحي وازيح الضيق
والعمر الباقي رضا وإحسان
هحضن قرآني ده أحلى صديق
