«طعم الشتا» قصيدة للشاعر سامح هريدي

صوت البابور

والكلفته جوَّاها واحنا بردانين..

وصوت أبويا

وهو طالع بالقصب والبُرتُقال

المليانين حُب وحَنين..

صوت المطر ..

وهو نازل ع القلوب الطيبين..

عمَّال بيغسل في الشوارع والبيوت ..

ويصفي أرواح الجميع ..

الزحلقه..

والجري من غير الهموم

فوق الشجر متشعلقين

ومشعلقين..

 أحلامنا فوق غُصن الطيور..

رقص الزهور

علي لحن أنغام المطر..

الضحكة م القلب لساعات..

والذكريات

اللي لا يُمكن تتنسي..

أول ما بِتندّع أوام

يجري ينادي ع الجيران

عشان يلموا في الغسيل..

كات حِجة يعني عشان يشوفها

دي البدر..بيغير من كُسوفها

ضحكتها تشبه للسما

وأنا كنت أغلّس

 لاجل ما يزيد حُبها

كل الاماني وقتها

يومين غياب م المدرسة..

أمي ..وخوفها يجيلنا برد

ف تُحوطنا جوَّاها

وتربس الروح بالحكاوي المُبهجة..

حالة رضا

كات عامة ع البيت واللي فيه

كات شاملة كل الناس هنا

بيتنا .. شارعنا.. حيّنا

كل الحاجات كان طعمها

والله حلو

الذكريات..

علي قد ما بتسعد قلوبنا

بتسيب وجع..

حتي الشتا

 بقى طعمه مر

مبقاش يُمر ..

غير لما يوجع قلبنا..

مبقاش يُمر

غير لما ينزل دمعنا

زي المطر..