بيتي اللي كانت عزوته
طوبه ورا طوبه
اتعرى واتصور
والبصاصين بتهيص
آيه اللي مستاهل نشوفه
نشتري له قميص؟
دي الساقية دايره تلم هدمتها
خجلانه م المنظر
جارَّة العيدان الخضر
في الضلمة تتسابق
ملعونه طينه
لوهتولد قمح
والسيرة بطاله
كتف البنات انهد
والحِمل رجاله
واخدين على الترحال
والبخت متحني
وانا لسه بنت بنوت
بارسم قلوب ع الحيط
والضُهر بيأدن
برق العجز بالليل
وعليَّ بيحرجم
فقعدت فى الألبوم
صوره بتنضح بور
يا معلم الميه
تطلع لعاشر دور
عطشانه قلتنا
والمية تختروان
شايل عرايس نيل
محرومه م الزفه
اخرج ياجني م الفانوس
لف الزمن لفه
رجعلنا رق الحبيب
خلي الغناوي تبني بيت
ع السكة متحندق
إرفي الغلابة
قوم ووسع لبسَك الضيق
تحلو غنوه معكره
تقدر تقول الحق
ياكلمه مين علِّمك
تتخبي جوه الحلق
إزاي نطوف متكتفين
والسعي فيكي بزق
ده انا لوني من ليلك
على وشي بينقط
ف ازاي هيطلع صبح
والفجر بيغمض
عينه اللي شافت وِلدها
فوق الصينيه فطار
للدوده لما استطعمت
عضم اللي لسه صغار
والغيمة دارِت ع اللي فاضل
من بواقي العيد
لا لحقنا نفرح بالخِرَق
ولا طولنا حُق دقيق
ودموعي راقدة اتحجرت
طالت فى حبستها
هيجيلها يوم
تنزل سيول
وتزيح في سكتها
اقرأ أيضا|الكاتبة سهام الوهيبي تكتب: عالَم أسوَد!
