١

قلبى الصغير هَش

وماليش ف الهوى حيله

 والرمش طاغي

قالت لي: مين اللى ف طريقك..

حطّني؟

قلت لها: النصيب

واهو النظرة اللى مابتصيبش

بتلاغي

٢

كاس الشقا مليان

كتّر خيره

يخلص وجع يسقينا غيره

والليل يعد الكاسات

ويقيّد

اتنين ف بار الدنيا

الخوف يصب والعمر يشرب

ويقول: أنا حر

والخلق تضحك ع اللى متقيّد

٣

روحى وانتى

زى خلع الضرس بيريّح

زى صورة كل ما تقرّب

بتوضح

كان كمين غُربه وتعب

حُضنين شقايق

حُضنين حرايق هَم وانزاحوا

ولا ليكِ شوق

ولا باقى من جرحك أدلّه

روحى وانتي.. مُحتل

مطرود من أرض محتلّة

٤

غريب

وشيب الحزن..

خدنى بحضن طوّقني

قاللي: أدوق طعمك

قلت له: بعينك

ولا شعرة من دقني

قبلك كتير فات من هنا

ولا حد يوم داقني

غريب

واكدب عليك لو قلت

صدّقني

٥

متكدّر..

قلبى وقال ع اللى صوّر

ضرير

مكنش واجب عليه

يفتح زاوية التصوير

وأنا ماشى وشايل هم

على كتفى اللى نَخ

مالقيتش واحد سند

ولا ايد بتعطف وقالت: أخ

دى الرجل مكسورة

متكدّر

قلبى وقال للى صوّر

مكنش واجب عليك

تاكلنى لحم الليالي

وتحط هزايمى ف الصورة.

اقرأ ايضاً | صالح لبريني يكتب: شَبِيهٌ بِالنَّهْرِ إلى بحيرة تامدة التي تسكن خاطري والمهدّدة بالزّوال

نقلا عن مجلة الادب : 

2023-3-4