أدلى الفنان هشام عباس، بالعديد من التصريحات حول أعماله الفنية الجديدة وحياته الشخصية، وذلك خلال مداخلة هاتفية لبرنامج "خلاص صحينا" بـ"ميجا إف إم".
وقال هشام عباس: "أحلى حاجة حصلت لي السنة اللي فاتت كانت جواز بنتى ياسمينا، كنت سعيد جدا ومتأثر أوى لدرجة إنى كنت بضحك وبعيط فى نفس الوقت".
وأضاف، أنه فخور بمشاركته في مهرجان أبيدوس الذى تنظمه دار الأوبرا في سوهاج، وكانت حفلة جميلة جدا أمام المعبد، ومشاركته في مهرجان المحكى بالقلعة من أسبوعين.
وأشار، أنه يحب عمل حفلات والتواجد فى كل محافظات مصر حتى يترك تأثير جيد فى كل الناس، مضيفا: "السنة دي إن شاء الله هخلص الألبوم بتاعى قبل 2022 ما تخلص، وكمان بشتغل على البرنامج الجديد اللى هقدمه، ونفسي أعمل مسرحية غنائية كوميدية".
وتابع عباس: "طول عمري بحاول أعمل أشكال مزيكا مختلفة من أول ما بدأت، ومن سنة 2007 بحاول أشتغل حاجات جريئة زي اللى قدمتها مع عزيز الشافعى في أغنية "دي طريقة دي تتكلمي بيها معايا"، ومع أيمن بهجت قمر عملت أغنية "عينك فى عيني يا نور عيني".
وأضاف، أن "الألبوم الجديد سيكون ميكس بين المقسوم بتاعنا والمقسوم الجديد اللى بيتعمل فى الأغاني الشعبي وأغاني المهرجانات بس بشكل جميل"، مشيرا إلى أن الألبوم القادم فيه أغنيتين واحدة اسمها "عن اقتناع" وأغنية اسمها "كلامها حلو، وبتعاون فى ألبومى الجديد مع عزيز الشافعى وأمير طعيمة وتوما ومدين وأيمن بهجت قمر".
وذكر هشام عباس، أن البرنامج الجديد مفاجأة واستكمال لبرنامج شريط كوكتيل، ونفسي أمثل جدا بس فى نفس الوقت نفسي أقدم حاجة تعمل فرق، عشان كده بفكر فى المسرح لأن رد فعل الناس فيه بيكون مباشر.
وقال: "أحب أمثل مع داليا البحيري لأنها دمها خفيف، ومع نيللى كريم، وأيتن عامر، وشذى، وأغنية ناري نارين نجحت جدا لدرجة إنه شاروخان أخدها وعمل منها أغنية فى فيلم وبعتلى وشكرنى على التعاون ده".
ولفت إلى أن "أهم حاجة فى أى علاقة إنه ما يكونش فيها أحكام.. يعنى ما نحطش بعض فى قوالب لأنه كلنا مش زي بعض، والراجل والست هما اللى بيحددوا كل طرف ملزم بإيه، وكل بيت ليه طريقة فى الحياة مختلفة عن أي بيت تانى، أهم حاجة ما تسيبوش الناس تدخل في حياتكم وتبوظها".
