شهقة فى سجدة جت على غفلة، شهقة فى صورة وسط الحفلة، شهقة شاب فى وش حبيبته لما الظابط أخده مخالفة، شهقة صياد لمّ شباكه بعد ما جبرت ونسى الدفة، شهقة واحد أنقذ واحد كان بالعافية واقف ع الحافة.
شهقة أب شايف ابنه وهو بيطول يوم عن يوم، شهقة عيل تحت الدوش لسعت عينه رغاوى صابون، شهقة جدة لصورة وقورة سقطت غلطة من الألبوم، شهقة جد فى لمة عيلة ساعة مغرب شهر الصوم، شهقة موت والقضا محتوم.
شهقة فجأة بسعر مفاجأة لبياع واقف خلف كاشير، شهقة لضحكة بنت جميلة كانت راكبة جنب شوفير، شهقة أب فى صدر البنت قلبه يرفرف زى الطير، شهقة تجيبك وتوديك، شهقة لبوست يموت ضحك وانت بتضغط لاڤ وشير.
والحياة كلها شهقات، شهقة توطى وواحدة تعلى وشهقة تخلى الحلو محلي، والمزاجنجى تلزمه شهقة علشان يفضل عال ومعلي، والسفروت خطف البنوتة بعد ما كانت ماشية فى ضلي، شهقة فى عز البرد فى حضنه قشعر جسمى اتلخبط كُلي.
المذيعة بكل هدوء قالت «فاسل»، قالت ايه!، قالت «فاسل سُم نواسل»، والسّميع قاعد على تكة مستنى اعلان الشقة، شهقت فينا الست مذيعة وبعصبية جديدة ع الحلقة قالت فجأة: أصل الكشرى ابو حمص بايخ وان حلاوته يكون بالدقة، أما صاحبنا بتاع الشقة محروق دمه حتة حرقة.
شهقة بيبى نازل لسه سمع الهانم فى اليوتيوب، شهقت شهقة وحلفت انه لبن الأم مش مرغوب، شهقت ست حويطة أليطة وقالت: جايز يرضع بالشقلوب، أما الدكتور النفسانى قال بخشونة: من مصلحة الطفل عمومًا يشهق شهقة وياكل طوب، والأيام لون الخروب.
شهقة لمذيع الأخبار وقف اتنحنح مط شفايفه وشد البدلة وقال بوقار: ان الشهقة اذا كانت سخنة تضرب فورا الاستقرار، ثم وحذر: اياكم والشهقة اياها لازم نطرد الاستعمار، والانسان فى الأصل حمار والعالم هايولع نار، أما الحلقة فكان موضوعها.. كان موضوعها.. آااه الأسعار.
شهقة دور فى طابور أمور، بص موظف فى الباسبور شهق الشهقة وقال: ده مش انت، أنا مش شايف غير طرطور، ساعة استنى وآدى التانية، فى التالتة ادونا بخور، ثم سعادة البيه بسلامته قال يا مواطن ايوه تمام هو انت بعينه.. السيستم واقع مكسور.
شهقة لما النور قطع وشهقة لما النور رجع، شهقة لما الواد وقع، وشهقة لما طلقة غدرت بالجدع، وشهقة من شدة وجع، وشهقة لما شبّ الواد ومسك الفاس زرع، وشهقة من شدة ولع، وشهقة لما العين صابتنا بالهلع، وشهقة وشوشة الودع، وشهقة وريتنا البدع.
شهقة ميلاد وشهقة بعاد، وشهقة حبيب السنين اللى عاد، شهقة سهاد، شهقة وليفة فى ساعة الميعاد، شهقة جهاد وشهقة فساد، وشهقة أنين ع البتاع اللى ساد، وشهقة تصون العيال الشداد، شهقة عناد، وشهقة تجيلك فى ساعة حداد، وشهقة تزورك فى لحظة فساد، وشهقة كساد وسعر المزاد، وشهقة تكمل عليك المراد.
شهقة واحدة تعلمك وواحدة تانية تفهمك، وشهقة تعدلك وتقومك، وشهقة توزنك وتؤلمك، وكله لسه شاهق له شهقة حتى الواد أبو ضحكة شاهقة لسه برضة شاددله شهقة، والكلام ده فى أصله شهقة، وانت تستحق راحة.. اتفضل اشهق لك شهقة.
