الحياة حلوة
قالها مدرب تنمية
ثم اتحلل جسمه ع المسرح
لما فارت نسبة الأملاح
من كدبه على روحه بلغة الجسد.
يقول ممثل مسرحى:هى الخروج ع النص.
يقول عالم الأحياء:هى اندلاع لشجرة الأسماك
وترد أسطورة:لما موسى قام بشق البحر.
يقول المؤرخ:هى اختلاط الماضى بالحاضر
صوت القتيل المهمش لما يتزور تاريخه.
يقول عسكرى فى الجيش:هى نهاية الحرب وإزالة الحدود.
عاشق بيتذكر حبيبته.
يقول عالم لغة: هى اكتشاف معنى مابيشرحوش اللفظ.
عازف موسيقى قطع كلامى
واكتفى بعزف البيانو.
الفيلسوف يسألنى ما معنى السؤال؟!
يقول شاعر:الحياة مش نص أدبى
هتعيش بتتمنى كماله
تنشغل بالنقد والتنظير فماتكتبوش
جرب تعيش مرتجل
انتشى بهواجس الأفكار
ولا تعمل حساب لتدوينها
آمل تلاقى نظرة الإعجاب
أو الخلود البعيد
لكن خسارة لأن..،
متعة كتابة الحياة وبحثى عن الكمال
نستنى فعل الحياة ونشوتى بالنقص.
وأنا ما زلت ببحث عنها
بحاول ألمسها لكن خايف
أكتشف إنها غير اللى بتمناه
قال الصدى:جايز تكون المحاولة هى الحياة.
اقرأ ايضا | صالح لبريني يكتب: نُوسْطَالْجِيَا
