كتبت - نرمين جودة
قالوا زمان الفنون جنون وحتى فى الافلام كان بيصوروا ادوار الفنان فى بعض الافلام على انه شخص غير طبيعى وهنا لازم نسأل نفسنا هل فعلا الفنون جنون او نوع من الجنون ؟؟ هل الابداع عبقرية؟؟ وهل العبقرية بينها وبين الجنون شعرة؟؟.
عندنا فى علم النفس نظريات كتير اتكلمت عن علاقة الابداع بالجنون ومنها نظرية التحليل النفسى لفرويد اللى قام بتحليل الاعمال الفنية فى ضوء تحليل دوافع النفس البشرية.
وقال فرويد ان الابداع الفنى هو تنفيس للرغبات المكنونة للانسان واللى مقدرش يخرجها فى شكل سلوك يومى ولو سيبنا فرويد ورجعنا بالزمن شوية هنلاقى فلاسفة الاغريق اعتبروا ان الفنان كائن مميز عند الالهة وعشان كده الالهة اختاروه ونزلوا عليه الوحى الفنى لكن مع التطور العلمى رفض اهل الحداثة كلام الاغريق وقالوا الكلام عن الوحى ده كلام مش منطقى ووصفوا المبدع بانه متميز بخيال واسع مش عند غيره من البشر والقدرة الخيالية الفريدة دى هى اللى خلت الفنان يشطح بخياله ويغوص فى اعماق عالم احلام اليقظة ويفرز اعمال فنية عظيمة.
ومجموعة تانية من علماء النفس قالوا لا بقى الفن ده تعبير عن معاناة الفنان الانسانية وللظروف والضغوط اللى اتعرض لها الفنان كانت السبب لاظهار موهبته رد عليهم علماء نفس غيرهم قالوا الابداع ظاهرة استثنائية وراها فطرة اتخلق بها الفنان وهى السبب فى تميزه وابداعه.
الخلاصة ان مهما كانت الاسباب والدوافع فالمبدع حالة فريدة وكل مبدع فى مجاله مش بالضرورى يكون مبدع فى مجال اخر وعشان نستفيد من القدرات الابداعية لازم يكون فيه وسبلة لاكتشاف موهبة كل انسان وقدراته الابداعية وتوظيفها بالشكل اللى يخدم البلد ويحقق تقدمها.
