إسراء إسماعيل
عيد الهالويين فى الغرب بيكون يوم واحد بس فى السنة يمارسوا فيه الرعب على بعض ويلبسوا حاجات تخلى شكلهم مرعب ويزوروا القبور بالليل ويولعوا الشموع عند الميتين ويترددوا على الاماكن المسكونة ويقروا قصص رعب..
يوم واحد بس فى السنة!
يا حبايب قلبى يا هالووين احنا بنمارس الرعب مع بعض يومياً صباحاً ومساء مع مراعاة فروق الذعر بين البلدان..
حضرتك لما بتصحى الصبح تدخل حمامك وتيجى خارج تلاقى المدام صحيت وشعرها كمان صاحى زى أشعة الشمس المتوهجة والميكب بتاع امبارح نايمة بيه، لتظهر كلوحة فنية عشوائية ناطقة للفنان بيكاسو وبتقولك «شديت السيفون ولا نسيت؟»..
ده هالووين ولا مش هالووين يا متعلمين يا بتوع المدارس!
لما مديرك فى الشغل يتصل بيك فى يوم الاجازة اللى بيتاخد كل ١٥ سنة ضوئية، مش ده بردو هالووين؟
ده غير ان احنا كمصريين لما بنتجمع فى قعدة عائلية كدة بنستمتع ان كل حد فينا يحكى موقف مرعب حصله ولا عفريت شافه وبنبدأ نعلى على بعض فى السرد..
الموضوع ده بينتهى عادة ان ماحدش فى القعدة دى بييجى له نوم لمدة ٣ أيام.
طب لما مندوب شركة الشحن يكلمك ويقولك يا مدام الاوردر بتاعك وصل وانا عند البيت..
أظن ده ليڤل الوحش من الهالووين وكل ست عارفة كده كويس..
ولا إيه؟ لو ركزنا فى تفاصيل يومنا هنلاقى ان احنا ما شاء الله بنعيش الهالووين فى كل لحظة مش فى يوم واحد بس فى السنة!
