عزيزي قارئ المقال.. أيوه أنت!!
قبل أي كلام وقبل ما ندخل في موضوعنا حابب أقولك "كلك عَلِى بعضك حلو".. أيوه أنت بكل تفاصيل بعصبيتك بجنونك بكل حاجة فيك.. حتي وأنت صاحي من النوم "منكوش" ومش شايف حاجة وبتفكر في كل حاجة برضو "حلو".. ياعم أيوه أنت.. أنت زي ما بقولك..
شوفت الابتسامة اللي ظهرت دلوقتي.. هي ديه المطلوبة..
باختصار كده كل واحد عايش في عالمه الخاص بمشاكله بقرفه بلحظات سعادته بهمومه بكل حاجة فيه.. أوقات كتير الشخص بيبقي واصل لحافة الانهيار .. متلخبط.. مستني أي كلمة أو إشارة حتي لو ابتسامة تديله الدافع.. الدافع!! "أيوه والله زي ما قرأت الدافع".
-الدافع ده ممكن يكون كلمة شكرا من مدير للموظف بعد مجهود كبير .
-الدافع ده كلمة "تسلم ايدك ربنا يخليكي" لزوجة بعد أكله حلوة .
-الدافع ده بين الصحاب فـ"أيه الشياكة دي" و "الجيم والخسسان حلوين عليكي استمري".
-الدافع اللي ممكن يكون كلمة من الأب لأبنه تخليه فرحان ومبسوط وناجح في حياته
الدافع والكلمة الحلوة دول حاجات كتير أوي في حياة الكل.. ودول "قشة" ممكن تطلع حد من الانهيار والاكتئاب وحاجات تانية كتير..
خليك فاكر وعارف كويس جدا أن كلمة واحدة حلوة ممكن تغير حياة ١٨٠ درجة.. وتكون دافع لإنسان إنه يغير من نفسه وينجح ويعمل المعجزات.. والعكس تمام كلمة سلبية حتي لو عَلِى سبيل الهزار ممكن تدمر شخص..
الخُلاصة.. "خليك دافع ومتزودش الهموم.. خليك نور في وسط الغيوم".
