بقلم/ أميرة الرفاعي
«السوق مضروب».. ملخص جلسة طويلة مع اصدقائى اتكلمنا فيها عن حياة ما بعد الطلاق سواء للراجل أو الست، وخاصة ان طلبات الطلاق من الشباب حديثى الزواج بقت كثيرة وتخض ولأسباب «تافهه» من وجهه نظر أى حد، ومن بعدها بدأنا نتناقش مش يمكن البنت اللى بتطلب الطلاق دى عندها حق وربما تلاقى راجل يقدر افكارها وانفعالاتها أكتر من اللى هى اتجوزيته؟ ربما!
تقريبا وبعد ما اتكلمنا على حالات كتير من الاصدقاء والاقارب اللى تعرضوا فى بداية حياتهم الزوجية لبعض من عدم التفاهم والتفكير فى الطلاق، اتفقنا كلنا على ضحكة واحدة تتبعها جملة سائدة يعنى هى فاكرة انها لما تطلق منه هتلاقى شخص بلا عيوب يا جماعة «السوق مضروب».. وبعدها بدأنا نفكر جديًا ليه البنت دائما متصورة أنها هتتجوز «سوبر هيرو»!
من خبراتى الشخصية بالاضافة لبعض الخبرات المكتسبة من مشاكل الاصدقاء والاقارب، هنلاقى أن 90% من البنات حديثى الزواج اتجوزوا علشان الفرح والفستان الأبيض، فضلا عن أحلام «سيشن الحمل» و «سيشن عيد الجواز» و «سيشن الهانى مون» إلخ ، ونضيف عليهم عدد من الأفكار اللى بليتنا بيها الـ«سوشيال ميديا».
وطبعا لصغر سن البنات دى وقلة خبراتهم معندهمش ادنى تصور لمتاعب فترة الحمل ومصروفاتها والعبء الاقتصادى اللى هيكون على اسرتها فى الوقت دا، زى ما هما مش فاهمين أن الراجل مش مجرد «ATM» دا إلتزام ارتضيته البنت وقت ما وافقت تتجوزة فهى ملزمة تراضيه وتحتويه وتحافظ على مشاعره وتهيئلة الحياة المريحة اللى هو محتاجها مش اللى هى عوزاها فقط ، ورسالتى لأى بنت ناوية تتجوز لو متخيلة أنك هتتجوزى شخص بلا عيوب يبقى متتجوزيش أفضل وإلا هتطلبى الطلاق بعد شهر واحد من الجواز، واتعلموا أن الجواز مسؤولية واستمرار، وإن لو حياتك مش مستقرة تأكدى إن المشكلة عندك انتى لانك «ست البيت» فخليكى «ناصحة» وحافظى على بيتك وجوزك.
