الـ «4D» لا يمكن تنزل الأرض أبداً

مع اول اسبوع جواز وانا لسه بزور ماما اقابل جارة ماما وبعد السلامات والتحيات 
تحط ايدها على بطنى.. وتقولى ايه مافيش حاجة جاية فى الطريق.. يا طنط انا بقالى اسبوع.. تقولى مش مهم المهم اشيل عيالك.. وتحققت امنية طنط (س).. وبقيت حامل وفضلت لحد الشهر السادس.. معرفش نوع الجنين ايه.. وكنت فى تكهنات من كل اصحابى 
بطنك بتقول انك حامل فى ولد وصديقة تانيه تبصلى وتقول بس انتى احلويتى شكلك حامل فى بنت وفضلت فى ولد بنت، بنت ولد 
لحد ما عملت اشعه الـ «4d» رباعى الأبعاد ومعروف انها لا يمكن ان تكذب هذه الاشعة او تنزل الارض ابدا 
وعرفت من دكتورة الاشعة وبالمناسبة كانت دكتورة لطيفة وخفيفة الروح انها بنوته كتكوتة قطوطة وهتطلع حلوة لمامتها ايوه شبهى ايوه انا بشكر فى نفسى عادى 
وبقى كل ما حد يسألنى 
النوع ايه اقول بنت الاقيهم يقولوا لا بس بطنك بتقول انك حامل فى ولد.. ارد طب ازاى الـ«4d» متكذبش ابدا.. يردوا لا اكيد مش هتفهم زينا 
الاقى صاحبتى 
بعتالى على الواتس اب.. راندة مناخيرك بتقول حامل فى ولد.. اقولها يا بنتى ازاى بس.. ترد تقولى بتحصل عادى.. اخر حاجة روحت للدكتورة.. وبقولها الى حصل ترد تقولى.. متسمعيش لحد كله بيحب «يهرى».. المشكلة دلوقتى مش فى كل الهرى ده 
الموضوع اكبر من كدة انا اشتريت كل الهدوم بتاعه النونو « بينك» وبناتى.. افرض طلع كلامهم صح وطلع ولد 
ألبس ابنى «بينك» اه هلبس ابنى بينك الدنيا مش هتخرب يعنى حد يقولى ماله البينك 
لازم يلبس الهدوم دى عشان حاجات كتير اولا انا هكون فى حالة وضع ودى حالة لوحدها.. وحالة ارثى لها 
ثانيا مافيش ميزانية لمزيد من الهدوم.. فا انا طالبة من الله ولا يكثر على الله شىء.. ان فلوس الـ«4d» وفلوس الهدوم تطلع حلال وتطلع.. بنت.. وتبقى المشكلة الوحيدة هى «هنسميها أية»