سكوووت هنصور

النظرى حاجة والعملى حاجة
إفهم بقى وبطّل سذاجة
بطّل تكون شفاف كإنك لوح إزاز
إعرف حكايتى مع الجواز
إجمد عشان تعرف تصدّ
مفاهيم كتيرة اتغيّرت
لا.. مش هاقول شرّ ولابُد
 عندك يا سيدى مثلاً
جملة هات وخد
وقت لمّا كنت عازب
كنت باستخدمها عادى
بس ف مكانها المناسب
وقت لعب ماتش كورة
أو ساعة دفع الفاتورة
 بعد الجواز
هات فلوس عشان الدروس
خد معاك كيس الزبالة
لسه رايح فين تعالى
خد كمان ليستة مطالب
هات كتب ومذكرات
مجبتهاش من وإنت طالب
باختصار يا صديقى فكرة الجواز
محتاجة حدّ عنده إرادة من فولاذ