حبيبة جمال
رغم مرور شهر على ارتكاب جريمة قتل طالب الدقهلية ضحية مدرسه، إلا أن الناس مازالوا يتحدثون عنها وعن بشاعتها؛ في فصل جديد منها تنشر «أخبار الحوادث» نص التحقيقات مع المتهم قبل أولى جلسات محاكمته المقرر لها يوم ٢٠ مارس القادم. جلس المتهم محمد عبدالبديع، الطالب في السنة النهائية بكلية تربية قسم فيزياء، أمام غرفة التحقيق، واضعًا يده على رأسه، شارد الذهن، يفكر في مستقبله الذي ضاع في لحظة، منذ أن قرر اللعب والمراهنات وكسب المال من الهواء، كيف أقنع أقاربه وأخذ منهم أموالهم بحجة استثمارها لكنه ضيع تلك الأموال، وتطور معه الموضوع لدرجة أنه فكر وخطط ونفذ جريمة قتل، غدر بطالبه الذي استأمنه على نفسه وحياته وكان يعتقد أنه صديقا له، معتقدا أنه سيرتاح بعد جريمته ويبدأ حياته من جديد، ولكن هاهو اليوم مقيد اليدين، يقبع خلف قضبان السجن، ستأتيه كوابيس كل يوم تنغص عليه حياته، لم يفق من شروده سوى على صوت يناديه للدخول أمام وكيل النيابة ليسرد كيف فكر وخطط ونفذ جريمته.. في السطور التالية نسرد نص اعترافات المتهم كاملة، وستعرف من أقواله كيف تحول من طالب علم لجزار قتل وقطع جثة ضحيته.. وإلى نص اعترافاته.
> متى وأين حدثت جريمة القتل تحديدا؟
>> حدثت يوم 13/2/2024 حوالي الساعة ٧ وربع مساء في أوضة الدرس اللي أنا مأجرها في الدور الأرضي في قرية ٢٢ الأمل بجوار مدرسة الثانوية.
*من كان برفقتك آنذاك؟
>> كنت لوحدي.
> ما هي طبيعة علاقتك تحديدًا بالمجني عليه إيهاب أشرف؟
>> هو كان طالب عندي وبياخد درس من شهر ١٠ لسنة ٢٠٢٣م.
> منذ متى تحديدا نشأت بينكما تلك العلاقة؟
>> من شهر ١٠ سنة ٢٠٢٣ لما ابن عمته كرم وده يبقى صاحبي ورشحني له إنه ياخد عندي درس فيزياء.
> وما هي الأماكن التي كان يتردد عليك فيها المجني عليه إيهاب؟
>> هو كان بياخد عندي درس يوم السبت والثلاثاء فيزياء في أوضة الدرس في قرية النقعة وكان بياخد عندي درس كيمياء يوم الأحد والأربعاء في سنتر في قرية المركزية.
> وما هي آخر مرة تردد عليك المجني عليه؟
>> هو آخر مرة كان عندي يوم الواقعة ١٣/٢/٢٠٢٤ لما أنا قتلته في أوضة الدرس.
> متى نويت تنفيذ جريمتك؟
>> الفكرة دي جاتلي قبل يوم الواقعة بحوالي أسبوع وماكنتش لسه محدد إن أنا هقتل إيهاب وأطلب فدية من أهله بس قبل الواقعة بحوالي ٤ أيام تحديدا يوم الجمعة ٩/٢/٢٠٢٤ فكرت إن أقتل إيهاب وأطلب فدية من أهله وحاولت إن أنفذ الكلام ده يوم السبت وقعدت أهزر معاه بالسكينة اللي أنا اشتريتها وهو بياخد عندي درس بس خوفت بيني وبين نفسي أنفذ واقتله وبعد لما ابن خالي حسان قابلني يوم الاثنين وسألني عن الفلوس والأرباح اللي كان معاده ياخدها في شهر يناير فأنا قولت إني لازم بكره أنفذ مع إيهاب عشان ألحق أطلب فدية ويلحقوا يبعتوهالي عشان أديله الفلوس بتاعته وألحق أسدد الديون اللي عليا.
> وما الباعث على ارتكابك لتلك الجريمة بقتلك المجني عليه إيهاب؟
>> أنا كنت بمر بضائقة مالية بسبب إنى ضيعت فلوسي في تطبيق مراهنات اسمه one xbet وكنت سالف فلوس من جماعة قرايبي وكنت مفهمهم إن هشغل فلوسهم في تجارة الموبايلات مع واحد صاحبي مقابل أرباح أعلى من أرباح البنوك بس الحقيقة أنا كنت براهن بيهم في التطبيق ده وخسرت الفلوس دي وخسرت الفلوس اللي أنا كنت محوشها وكأن في ناس زي ابن خالي له فلوس مستحقة في شهر يناير وباقي الناس فلوسهم في أغسطس وأنا لما حسبتها لقيت إنى مش هقدر أوفي بالفلوس دي فقررت أخطف وأطلب فدية عشان أسدد ديوني وأبدأ من جديد بعد ما حذفت تطبيق المراهنات ده لحد ما استقريت على قتل إيهاب.
> لماذا أصريت تحديدا على ارتكاب جريمة القتل ولم تلجأ لأي جريمة أخرى تتحصل منها على أموال؟
>> عشان كنت شايف إن مافيش حد أسرقه مثلا ولو خطفت حد وطلبت فدية هتكشف وماليش في المخدرات ولا أعرف سكتها.
> ولماذا اخترت إيهاب تحديدا؟
>> عشان عارف إن أبوه مرتاح ماديا وعنده مصنع سيليكون ومعرض أدوات منزلية وإيهاب ابنه الولد الوحيد على بنات وقولت أكيد أبوه هيدفع فلوس كتير.
> ما هي جملة المبالغ التي قمت بالتحصل عليها من أقاربك وذويك آنذاك؟
>> أنا أخدت مبالغ على فترات متقطعة من عمي حوالي ١٤٠ألف جنيه تقريبا ومن ابن خالي حوالي ١٥ ألف ومن زوجة عمي ٣٦ ألف ومن ابنها حوالي ٢٢ ألف ومن زوجة عمي الثاني ٦٤ ألف.
> وما هي الوسيلة التي استخدمتها في إقناع سالفي الذكر لمنحك تلك المبالغ آنذاك؟
>> أنا فهمتهم إني هشغل فلوسهم في أرباح الهواتف المحمولة وهرجعلهم فلوسهم بالأرباح وقبل كده أخدت من عمي ومرات عمي مبالغ بسيطة زي ألفين جنيه ورجعتلهم بعد ١٠ أيام الألف عليه ١٥٠ جنيه فهم حسوا إن الموضوع مربح.
> ما هي بادرة لقائك بالمجني عليه يوم ارتكابك للواقعة محل التحقيق؟
>> هو كان بياخد عندي درس فيزياء مع طالبتين وبعد ما خلص درس الفيزياء الساعة ٦ وتلت طلب مني اشرحله درس كيمياء فشرحته بسرعة وقعدنا نلعب بلايستيشن وفي الفترة دي أنا كنت بفكر ازاي أخلص منه فكنت بحاول أطول في اللعب لحد ما والدته اتصلت به مرتين؛ مرة ما بين درس الفيزياء ودرس الكيمياء، والمرة التانية كانت بتشوفه فين وتستعجله عشان يروح فساعتها لما قام يروح طلبت منه إن هو يصور معايا مقطع فيديو بتليفوني فيه خدعة مونتاج من اللي بتستخدم في أفلام السينما والمسلسلات.
> ما مضمون الحوار الذي دار بينكما؟
>> أنا فهمته إني عرفت خدعة مونتاج من اللي بتستخدم في الأفلام وأديته مثال وقولتله أنا ممكن أحط السكينة على رقبته بضهرها وأصور اللقطة دي بمقطع فيديو واحطها على اللاب واستخدم برامج معينة في خدع المونتاج ويظهر الفيديو بعدها وكأنه واحد مدبوح حقيقي وينزل منه دم وهو وافق علطول.
> وهل كنت تعتقد أن المجني عليه سيجيب بالموافقة على طلبك؟
>> أيوه لأن أنا عارف إيهاب من فترة وبينا هزار وبنلعب بلايستيشن مع بعض.
> وما هي كيفية ارتكابك للواقعة تحديدا؟
>> أنا بعد ما أقنعته إني ممكن أحط السكينة على رقبته عشان نعمل الفيديو اللي فيه الخدعة هو سابلي نفسه وقالي خلي السكينة بضهرها لأحسن تعورني وساعتها أنا مسكت بوقه بإيدي اليمين وجبت راسه على الجنب وخبطته خبطة جامدة في رقبته تعتبر إن نصف السكينة دخلت في رقبته وساعتها هو جسمه ساب وشوية حاول يستجمع قوته ويعافر وبعد كده ايديه راحت سايبة وأنا ماسكه وبعدها لقيته بدأ يثبت ويقاوم أكثر فضربته ببوز السكينة في بطنه من الناحية الشمال جنب السرة، إيده اليمين اتعورت وأنا بخبطه بالسكينة وبعدها وقع على الأرض بس كان لسه فيه الروح لأن هو قدر يزق إيدي من على بوقه وكان بيحاول يقول إلحقوني بس صوته ماكنش عالي أوي، فأنا خوفت إن حد يسمعه وإن حد يكشفني فقمت خابط ركبتي في دماغه خبطتين وهو واقع على الأرض وبعد الخبطة دي هو ساب خالص وما اتحركش تاني.
> ثبت من مناظرة النيابة العامة للجزء العلوي من جثمان إيهاب دون رأس ووجود قطع طولي بالضهر أسفل الكتف من الناحية اليمنى من الخلف بالقرب من مفصل الذراع الأيمن، فمن محدث ذلك الجرح الإصابي؟
>> أنا اللي عملته.
> ما سبب وتوقيت إحداثك لذلك الجرح الإصابي؟
>> أنا كنت بحاول أحطه جوه الكرتونة بس الكرتونة كانت بتتفتح من الجنب فأنا حاولت أقطع الذراع زي ما قطعت الرأس.
> ما التصرف الذي بدر منك عقب إجهازك على المجني عليه وتثبتك من إزهاق روحه؟
>> هو لما كان واقع على الأرض في الأوضة أسفل السبورة كان ظهره للسبورة ووشه ناحية الحجرة وكان على جنبه فأنا سيبته على جنبه وبدأت أفصل جسمه عشان أقدر أحطها في الشكاير والكرتونة.
> ما هي الكيفية التي استخدمتها في التخلص من جثة المجني عليه؟
>> لما تأكدت إنه مات بدأت أقطع الهدوم بتاعته لأن لقيت حجمه كبير وقررت أقطع الجثمان واستخدمت نفس السكينة اللي قتلته بيها وبدأت أقطعه من الجانبين بشكل دائري لحد ما وصلت للعمود الفقري وساعتها قلبته على وشه وحطيت السكينة بين فقرة من فقرتين العمود الفقري وفضلت أدوس على ضهر السكينة برجلي لحد ما كسرت العظمة بتاعت العمود وفصلت الجثمان لنصفين وبعد كده لما جيت أحط النصف العلوي في الكرتونة لاقيت راسه ظاهرة من الكرتونة فقررت أفصل الرأس فرحت ماسك السكينة وبشكل دائري لحد ما فصلت رأسه وكده قسمت الجثمان لثلاثة أجزاء؛ الجزء السفلي ربطت رجليه الاتنين من الخلف بحبل دوبارة في الحزام اللي كان لابسه وحطيته في الشيكارة الخيش البني وبعدين حطيته جوه الشيكارة البيضاء البلاستيك وبعدين جوه الشيكارة الزرقاء وربطتها، والجزء العلوي من الجثمان عقب فصل الرأس فرشت الكرتونة بأكياس زبالة سوداء ولما جيت أحط فيها الجثة لاقيت إن الدراع اليمين هيخرج بره الكرتونة أنا حاولت أقطعه بس لاقيت هياخد وقت كبير فحطيت الجزء العلوي من غير الرأس زي ما هو وحطيت الرأس في كيس أسود وحطيتها جوه الكرتونة وقفلتها بالغلاف بتاعها.
> ما هي الفترة الزمنية المستغرقة منذ بداية تعديك على المجني عليه؟
>> حوالي ١٠ دقائق.
> ما هي الفترة الزمنية التي استغرقتها في تقطيع الجثمان؟
>> من ٢٠ لـ ٣٠ دقيقة.
> ما هي كيفية تخلصك من أجزاء جثمان المجني عليه؟
>> أنا خرجت من البيت وأخدت الكرتونة اللي فيها الجزء العلوي والرأس وحطيتهم قدامي على الموتوسيكل ومشيت في طريق رئيسي اسمه النقعة بصار، لحد ما وصلت لكوبري وده اللي حطيت فيه الجزء العلوي على أحد جانبي المجرى المائي فوق الماسورة ورميت الرأس في نصف الترعة وبعد كده رجعت تاني من نفس الطريق لحد الأوضة وجبت الشيكارة اللي فيها الجزء السفلي ورميتها في أرض زراعية ورجعت تاني الأوضة جيبت المتعلقات بتاعته ورميتهم في البحر كل حاجة لوحدها.
>>>
وبعدما أنهت النيابة تحقيقاتها مع المتهم، وجهت له تهمة القتل العمد مع سبق الإصرار والترصد، وتم تحويله لمحاكمة عاجلة، ينتظر كلمة المحكمة والقصاص العادل كي ترتاح قلوب أسرة ذلك الصبي الذي مات غدرا دون أي ذنب وتم التمثيل بجثته ودفنته أسرته على ثلاث مرات.
وتولى المحامى علاء عبدالعزيز الدفاع عن حق المجني عليه.
اقرأ أيضا : كشف لغز العثور على جثة ربة منزل داخل شقة سكنية بالغربية
