أكتوبر الوردى «أمل»

.. واحنا فى أكتوبر الشهر اللى اتحرم من دفء الصيف ورومانسية الشتاء وبتنتهى فيه أحلام الصيف الزاهية وتفضل آمال الشتاء غامضة لسه ما اتولدتش.. عايزين نقول لأكتوبر.. أنت الأمل.. انت الوردي.. انت اللى لونك زى أزهار القرنفل.

عايزين نقول لمريض السرطان أن الألم مش هايتمكن إلّا مِمَن ضعفت روحهم، اللى مكسلين يرووا زهور حدائقهم.. عايزين نقول لمريض السرطان هاتكسب التحدى لما تقدر تخفى السرطان باستكمال رحلة العلاج الممكن واحنا ماشيين فى حياتنا لا شيء يُحزننا، هانخوض تجربةً وهانكسب الثقة وهانكسب المواجهة.
أنت الأمل.. انت أقوى بكثير من المرض.. ماتخافش السرطان كلمة.. انت مش لوحدك.. قد لا تكون حيث تتمنى الآن، لكنك ما تزال تعيش متعة الحياة.
المناظر والأصوات والروائح والأماكن اللى بتنبض بالحياة فى قلبك فى صدرك تحت ضلوعك.. انت البطل فيها انت مش لوحدك وربنا معاك.. ماتفكرش فى اللى باقى من عمرك هايكون إزاي؟ لكن هايبقى مع مين ؟ ..حياتك فيها أشياء جميلة

ارسم على شفايفك الابتسامة كلما فكرت فى رحمة ربنا معاك.. وأتمنى كل شيء تحبه.. ومايهمكش الناس اللى خسرتها فى حياتك.. دول كانوا أعداء.. وربنا أزاحهم عن طريقك علشان تفوق وتكمل رحلة علاجك.. انت ممكن تكسب فى يوم واحد شخصًا يُعادل كل اللى خسرته فى حياتك كلها ويمكن أكتر كمان.
واذا كان المرض هو وقت الاختبار للعلاقات اللى بدأت فى وقت مبكر.. فالطريق للشفاء هو فى حسم الأمور، إما بالاستمرار أو بالانتهاء
متزعلش إنك عيان او أصبحت مريضًا، لكن هاتقف وهاتسترد صحتك وعافيتك.. وخلى جواك الأمل دائمًا وماتنساش أن الابتسامة الوسيلة الوحيدة لكسر الحاجز والخروج من المرض للصحة وافتكر دائمًا أن الرفيق الحقيقى إذا ماقدرش ينقذك فتأكد أنه لن يسمح لك بالسقوط أو الانهيار.

افتكر دائمًا أن العلاج ممكن وأن الحياة مستمرة.. ودائمًا ردد: أعوذ بكلمات الله التامّات من شرّ ما خلق

أذهب البأس رب الناس، واشف أنت الشافى لا شفاء إلا شفاؤك شفاءً لا يغادر سقمًا

بسم الله الذى لا يضر مع اسمه شيء فى الأرض ولا فى السماء وهو السميع العليم.