قواعد ذهبية للإتيكيت لو مدعو على عزومة شم النسيم عند الأهل أو الأصدقاء

تجمعات شم النسيم تعد من أجمل اللحظات الاجتماعية اللي بتقرب الناس من بعض، سواء كانت بين الأهل أو الأصدقاء، ورغم الأجواء البسيطة والمرحة، إلا إن فيه شوية تفاصيل مهمة بتفرق جدًا في الذوق العام، وبتعكس احترامك للمضيفين.

لذلك يجب علينا أن نكون على دراية بأساسيات الإتيكيت اللي بتخلي حضورنا خفيف ومحبوب، شريهان الدسوقي، خبيرة الإتيكيت والعلاقات الإنسانية، شاركت بمجموعة من النصائح المهمة علشان نتصرف بذوق وأناقة في العزومات.

اقرأ أيضًا | عيد شم النسيم| احتفال فرعوني خالد يجمع المصريين على مائدة الطعام

أكد أواعتذر في الوقت المناسب

أول ما توصلك دعوة العزومة، حاول ترد بسرعة سواء بالموافقة أو الاعتذار،ده بيساعد أصحاب العزومة يظبطوا الترتيبات بشكل مناسب من عدد الأفراد والأكل والمقاعد، ولو فيه سبب يمنعك من الحضور، اعتذر بطريقة لطيفة وواضحة.

اعرض المساعدة بشياكة

سؤال بسيط زي "تحب أجيب معايا حاجة"؟ممكن يبين ذوقك واهتمامك، ممكن تعرض تجيب طبق جانبي، عصير، أو حلوى، لكن لو المضيف رفض، متصرش، كمان اسأل لو فيه حاجة معينة تخص طبيعة العزومة، علشان تختار لبسك وتستعد بطريقة مناسبة.

احضر في الوقت المضبوط

حاول توصل في الموعد المحدد أو بعده بدقايق بسيطة (بحد أقصى 10-15 دقيقة)، الوصول بدري ممكن يسبب توتر لأصحاب البيت لو لسه بيجهزوا الحاجات.

هات هدية بسيطة ومبهجة

لفتة صغيرة زي باقة ورد، طبق من صنعك، أو بيض ملون بيدي إحساس بالاهتمام والتقدير، مش لازم تكون حاجة غالية، لكن تكون نابعة من القلب.

استقبل الناس بود واحترام

سلم على أصحاب البيت بحرارة، واظهر امتنانك للدعوة،لو لاحظت إنهم محتاجين مساعدة، اعرض بلطافة، لكن احترم خصوصيتهم لو حبوا يعملوا كل حاجة بنفسهم.

كل بأدب واستنى الإشارة

ابدأ الأكل بس لما المضيف يشاور أو يدعوك في الأكلات زي الفسيخ والرنجة، خليك حريص على النظافة وخد كميات معتدلة. استخدم أدوات المائدة صح، ومتتكلمش وفمك مليان، ولو مش عاجبك نوع أكل، متعلقش عليه بساطة.

حافظ على المكان نضيف

لو حصلت غلطة زي وقوع أكل أو مشروب، نضف مكانك فورًا،بعد الأكل، اعرض تساعد في رفع الأطباق أو ترتيب المائدة، ده بيبان فيه احترام وذوق عالي.

ما تستعجلش تمشي

حتى بعد ما الأكل يخلص، اقعد شوية وشارك في الكلام أو أي نشاط، المغادرة المفاجئة بتدي إحساس بعدم التقدير، ولما تقرر تمشي، ودع الكل واشكر أصحاب البيت من قلبك.

ابعث رسالة شكر بعدها
تاني يوم، رسالة بسيطة فيها شكر وامتنان بتفرق جدًا،سواء واتساب أو حتى على السوشيال ميديا، المهم تعبر عن سعادتك بالعزومة وامتنانك للضيافة.

في النهاية، الاتيكيت مش بس قواعد اجتماعية، ده كمان بيعكس احترامك للناس وذوقك في التعامل،شم النسيم مناسبة مبهجة، ولما نتصرف فيها بذوق، بنخلي اليوم أحلى لينا ولغيرنا،ما تنساش إن التفاصيل الصغيرة هي اللي بتسيب الأثر الكبير.