ننشر أقوال فتاة أجنبية تحرش بها طبيب أمراض جلدية بـ«التجمع»

حصلت "بوابة أخبار اليوم" على أقوال فتاة أجنبية ضحية التعدي من طبيب أمراض جلدية داخل عيادته بمنطقة التجمع.

وقالت المجني عليها في تحقيقات النيابة العامة: "أنا كنت بعاني من طفح جلدي، فذهبت إلى إحدى العيادات الجلدية، لتوقيع الكشف، وهناك تقابلت مع الطبيب المشكو في حقه، وأثناء توقيع الكشف طلب مني الكشف على المناطق المتواجد بها طفح الجلد، وخلالها كانت منطقة الظهر وأعلى منطقة الصدر، واليد اليمنى.

وتابعت: وبعد الكشف كتب لي علاجا وطلب مني الحضور بعد مرور أسبوعين للاستشارة، وبالفعل ذهبت إليه وفوجئت يسألني بعض الأسئلة الغريبة، زي إذا كنت متجوزة أو لا، واذا كنت بأعجب بالرجالة المصرية أو لا وبعدها قولتله لا مش مهتمة بالرجالة المصرية.

 ولما قولتله لا.. قالي: ليه مش بتحبيهم؟، وانا مردتش عليه ساعتها، وبدا يقولي أن الرجالة المصرية كويسين ولازم تحبيهم، وقال أن ابنه متجوز واحدة أجنبية، وقالي لازم أعجب بالرجالة المصرية، وسألني اذا كنت قاعدة لوحدي، قولتله أيوه والنقاش خلص ومشيت، واما فكرت في الكلام، قولت عادي راجل كبير وبيسألني بدافع الفضول".

اقرأ أيضا| ننشر أقوال طبيب جلدية متهم بالتعدي على فتاة داخل عيادته بالتجمع| خاص

وأوضحت: "أثناء مرور الوقت ذهبت للكشف عنده مرة أخرى، لظهور حبوب في يدي اليمنى، وعند الكشف قال إنه سيقوم بكي الحبوب لانتهاء الألم، وخلالها تفاجأت بأنه يلمس أماكن حساسة بجسدي، وقتها كنت خايفة ومش عارفة أتصرف إزاي غير إني سيبت العيادة ومشيت على طول.

وتابعت: ولما اتكلمت مع صحبتي قالتلى دا تعدى جنسی، ولازم أبلغ عن اللي حصل وبعديها بدأت احس بحاجة غريبة وجالي أفكار سيئة جدا، وبعديها كلمت صديقي وقولتله على اللى حصل كلة وبعديها بيوم بعت رسالة للعيادة وقولتلهم ان الدكتور تحرش بيا ومحدش رد عليا.

 وبعديها بيوم لقيت الدكتور بيكلمنى على تطبيق واتس اب، وقبل كدا كان اداني رقمه في أول مقابلة لينا،وقالى لو احتجتى حاجة كلمينى ولقيته بيقولي أنه معاملش حاجه وانه مش قصده يلمس صدري، وأنه ده إجراء طبي وانا قولتله لا، وانا ما سمحتلكش بكده ولا اشتكيت وانت عملت كده بغرض تاني، وبعديها بلغت السفارة والسفارة قالتلي علي كذا محامي، واما اتعاملت معاهم بصراحة محدش سعادني اوي فابلغت صديق ليا بعدها وروحنا وعملنا بلاغ للقسم وجابوا المتهم واتعرض عليا و ده الي حصل".

إحالة طبيب شهير تعدي على فتاة داخل عيادته

وأحال المستشار أحمد يسري المحامي العام الأول لنيابة غرب القاهرة الكلية، طبيب أمراض جلدية للمحكمة جنايات القاهرة الجديدة لاتهامه بهتك عرض فتاة داخل عيادته بالتجمع.

جاء في أمر إحالة الخاص بالقضية رقم 9065 لسنة 2024  جنح قسم التجمع الأول، قيام المتهم "ج.م" صاحب 68 سنة مقيم في مدينتي، بهتك عرض فتاة حال توقيعه الكشف عليها بملامسه جسمها، مع استمرار حبسه على ذمة القضية، بعد استكمال التحقيقات التي تضمنت شهادات الشهود والأدلة الفنية والطبية.