أنا واحد حاضن تذكرته
علشان القطر ملوش مواعيد
ولإنه عنيد
بيراهن دايما ع الأوقات
عشمان القطر يكون تاجر
ويبيع مسافات
فازاى راح ييجى ويسمح لي
ويخون الوقت وقضبانه
يسمح لي إزاى
إني أفارق
العمر وقهرة حرمانه
يسمح لي إزاي
إني أودع
حواديتي ونوتة أشعارى
وازاى هيسيبني أكتب تاني
السطر الباقي ف مشوارى
وأنا عارف إنه واخدني بعيد
ولإن القطر ضلوعه حديد
هايحس إزاي
ويعدى عليا وينساني
معقوله القطر يكون نساي ؟
وأنا عارفه هييجي ومستعجل
وأكيد هياخدنى علي خوانه
لو حتي ف يوم غيرت مكان
ما الخانه بتشبه للخانه
وإزاي يستني ويسمح لي
وأنا لسه بلملم كراكيبي
لساني بأرقع ف جيوبي
أنا يمكن عيبي إني بلملم
حواديت العمر المتبعتر
علي كل رصيف
وأنا دفتر عمرى المتسطر
محتاج تصنيف
إزاي القطر هايسمح لي
ألبس نضارتي المكسوره
وأجيب الكاميرا وأتصور
وآخد مع عمرى ولو صوره
أنا يمكن حاجز تذكرتي
في الأصل ذهاب
والوقت اللي ف وشي بيضحك
دا أكيد كداب
فبدون أسباب
مجبور ع الضحكة اللي بتزرع
في الروح مسافات
فاتعيش جوايا يجوز حكايات
وتموت حكايات
ولا يفرق فيها اللي مكمل
ولا حتي هايفرق مين كان ساب
أنا واحد محتاج إنه يشوف
ويعدى ساعات لحدود الشوف
فيخونه تمللي النور ف عينيه
أنا إيه ؟ أنا ليه ؟
أنا أكتر واحد هنت عليا
فهنت عليه
أنا واحد كل مابيقرب
من شط عيونك بيخاف
ليفسر سره اللي ف عينك
فيكون متشاف
وكفيف الليل اللي بيعمي
واحد شواف
أنا واحد كل ما فيا مشاع
متصاحب دايماً ع الأوجاع
أنا كنت مفكر إني بابيع
أتاريني لوحدي أنا المتباع ..
«ضيفة غامضة» قصة قصيرة للكاتبة مارا أحمد
«إقرار» قصة قصيرة للكاتب محمد عاطف الجندي
«ورد الجلنار» قصيدة للشاعر عاطف الجندي
