السيسى يطالب بالحرص على المنافسة الشريفة وأخلاق الرياضة المحترمة

استقبل الرئيس عبد الفتاح السيسي  اللاعبين والمدربين، الحاصلين على ميداليات ذهبية ببطولة الألعاب الأفريقية، تكريماً لهم.

صرح بذلك المستشار د. أحمد فهمي المتحدث الرسمي باسم رئاسة الجمهورية .. وفى كلمة له خلال اللقاء رحب الرئيس السيسي باللاعبين والمدربين، الحاصلين على ميداليات ذهبية ببطولة الألعاب الأفريقية، معربًا عن سعادته بلقائهم، قائلًا: « ألف مبروك وبأهنيكم على اللي حققتوه»
وأضاف الرئيس السيسى:» أنتم فرحتوا كل الناس، وكل المصريين اللي شافوا النتايج اللي أنتم حققتوها، واللي ممكن كمان ربنا يوفقنا ونحققها فى باريس بيكم إن شاء الله وبزمايلكم اللي موجودين هنا او اللي موجودين في المعسكرات الرياضية برة، ربنا يوفقهم».

ووجه الرئيس السيسى الشكر للأبطال باسمه وباسم كل المصريين، كما وجه الشكر لكل المشرفين والقائمين من أجهزة إدارية وفنية، مؤكدًا أن هذا الجهد كبير جدًا.
وأكد الرئيس أن الرياضة تعكس مدي تحضر الدول والشعوب، وأنه كلما كان هناك نجاح وتفوق وميداليات أكثر، فإن النتيجة تعكس قدرة الدولة على المنافسة، وكلما حققت ميداليات أكثر كانت قدرة الدولة عالية.

وأضاف السيسى: أن مصر لديها عدد سكان كبير، و بالتالى فإن الفرصة سانحة لدينا لكى يكون لدينا لاعبون متميزون دوليون، «لأن عندنا حجم شباب كبير لو خد فرصته.. والكلام ده لينا كلنا ولكل مهتم بالرياضة لو الشباب خد فرصته ويبقى عنده فرصة فى لعبة معينة مش شرط كرة القدم فقط لكن فى أي من الألعاب»
و تابع الرئيس السيسى: « مش عايز أطول عليكم، أنا سعيد إن انتو موجودين معانا النهاردة، وسعيد باللي حققتوه في أفريقيا، وهبقي سعيد أكتر أو هنبقي كلنا سعداء أكتر.. لأن طبعا المنافسة علي مستوي العالم أكبر كتير من أفريقيا، وطبعا دول متقدمة جدًا في مجال الرياضة بتبقي موجودة، وبالتالي لو النتائج كويسة دا معناه إن احنا ماشيين في الطريق السليم».

وأكد الرئيس السيسي أنه رغم حرصنا علي الحصول علي ميداليات وبطولات وكلام من هذا القبيل، لكن دائمًا يبقي الأسلوب وتقديم أنفسنا بشكل يليق بمصر، مضيفًا: «يعني لو أنا النهاردة لاعب أو لاعبة موجودة خارج الدولة أو حتى داخل الدولة وكنت حريص جدًا إن أنا في ممارساتي وسلوكياتي كلها تعكس حجماً كبيراً من التحضر والقيم الرفيعة».

وأضاف السيسى:»صدقوني بغض النظر عن النتائج، يعني بغض النظر عن إننا نحصل على نتيجة كويسة، لكن ده جزء مهم جداً من فضلكم مهم أوي إن احنا كلنا نبقي حريصين عليه، اللي هو المنافسة الشريفة وأخلاق الرياضة المحترمة، خلوا بالكم من النقطة دي أوي، لأن ده بيبقي محل تقييم من الناس اللي بتشوفنا، وجزء كبير من الموضوع إن الناس تشوف الناس دي سلوكياتها إيه؟ وأخلاقياتها ايه؟، مش بس نتائج اللعبة».

واختتم الرئيس السيسى كلمته بقوله: «مرة تانية بقول لكم ألف مبروك وأهلا وسهلاً، سعيد باللي انتو حققتوه، ويا رب يوفقكم، ومش هنسي أقولكم إن انتو وجهوا بالنيابة عني الشكر لأسركم اللي هي ساهمت مساهمة كبيرة جدا فاللي انتو وصلتوله.. شكراً جزيلًا».