حرص عمرو يوسف على دعم زوجته كندة علوش، بعد إعلان إصابتها بمرض سرطان الثدي، خلال لقاء خاص مع منى الشاذلي.
ونشر عمرو يوسف صورة تجمعه بكندة علوش، وعلق عليها: "الحمد لله ثم الحمد لله ثم الحمد لله، الحمد لله على كل شيء، ظروف صعبة مرينا بيها على مدار سنتين لكن أنتِ كنتِ مؤمنة ومسلمة أمرك لله".
اقرأ أيضًا | «مكنتش قادرة أمشي».. كندة علوش تكشف كواليس فيديو «مهرجان فينيسيا»
وأضاف: "ظهورك وكلامك قوى ناس كتير هتبدأ رحلتها، وكانت خايفة لكن أنتِ في عز تعبك اديتيهم قوة، ربنا يخليكي ليا ولأولادك ولحبايبك في الدنيا كلها اللي ما بطلوش دعاء ليكي من ساعة ما عرفوا، ربنا يحبب فيكي خلقه كمان وكمان عشان أنتِ تستاهلي كل حب الدنيا يا أجمل قلب في الدنيا".
وسبق وأن كشفت الفنانة كندة علوش، إصابتها بسرطان الثدي منذ عام وشهر، وقالت كندة علوش خلال حوارها مع الإعلامية منى الشاذلي بـ البودكاست الخاص بها عبر قناتها على موقع الفيديوهات يوتيوب: بعد 9 أشهر من رضاعة ابني كريم، حسيت إني عندي مشكلة في إحدى الثديين ولما كشفت اكتشفت إني عندي أكتر من ورم خبيث، تلقيت الخبر بهدوء وسكينة ومانهارتش، وعمرو جوزي كان مرعوب أكتر مني، والنهاردة يبقى بقالي سنة وشهر بتعالج، ولسه بتلقى جرعات العلاج حتى يومنا هذا.
وتفاعل عدد كبير من نجوم الوسط الفني مع كلام عمرو يوسف فكتبت هند صبري:"ربنا يحفظكم لبعض و لأولادكم و يجبركم جبرا جميلا على كل اللحظات الصعبة الي عدّت"، وعلقت داليا البحيري قائلة:"ربنا يتم شفا كندة علي خير ويخليكم لبعض ولأولادكم يا عمرو".
وكانت كندة علوش تحدثت في الحلقة عن دعم عمرو يوسف لها، خلال فترة علاجها، قائلة:"عمرو لما عرف إني مصابة بالسرطان كان خايف أكتر مني وقلقان، وقررت أنا وهو إننا مش هنعرف حد لأننا مش عايزين نقلق الناس، وعمرو كان بيوصلني الجلسات ويقولي إن لازم حد يقعد معايا في المستشفى، عمرو كان داعم قوي جدًا لأنه شخص إيجابي ولا يستسلم للحزن وكل ما يشوفني هقرب من الحزن يرجعني ومروحش في السكة دي، وهو كان معايا في المستشفى ورحلة العلاج، وكان بيخفف عني ويسمعني وميسبنيش أستغرق في الخوف".
