كشف الفنان ماجد الكدواني، تفاصيل خضوعه لعلاج نفسي بسبب شخصيته في فيلم تراب الماس، موضحًا أن نجله وزوجته طلبوا منه زيارة الطبيب النفسي بعد تغير سلوكه.
اقرأ أيضا| الجزء الثالث من «موضوع عائلي» بعد العيد
وقال ماجد الكدواني، في لقائه مع الإعلامي عمرو أديب، والفنانة أصالة في بودكاست Big Time: أنا وكريم عبد العزيز كنا بنتريق على الممثلين اللي بيقولوا أنا عايش بالشخصية، وبالصدفة اكتشفت أني متأثر بشخصيتي في تراب الماس، لأنها كانت مستفزة وعميقة، ومراتي وابني ومروان حامد قالولي روح لدكتور نفسي مش عيب، وروحت فعلًا.
وأضاف: أنا حبيت الشخصية لأنها بتغذي حاجات بترضي الإنسان، ومروان حامد قال شخصية وليد سلطان دي المتعة المحرمة، لأن كل إنسان فينا عايز يعمل كل اللي نفسه فيه من غير جلد ذات وتأنيب ضمير وخوف من عقاب ولا لوم ولا قيم، كل إنسان عايز يعمل اللي نفسه فيه المتعة المحرمة.
وأكمل الكدواني: أنا كنت واصل لمراحل غضب مريع وبشوط حاجات برجلي، في طاقة غريبة جوايه، والدكتور قالي الشخصية أنت حبيتها ولكن هي موجودة في العقل الباطن، وأي شخصية أنا همثلها أو اتفرجت عليها ولمثتني ودخلت قلبي بتفضل في العقل الباطن، وخدت كورس لطيف وبدأت أهدى من غير أدوية خالص.
وواصل ماجد الكدواني: بعدها بفترة حصل موقف غضبت غضب انفجاري، بسبب أن حاجة ضاعت مني ومش لاقيها، وكان غضب هستيري وبشوط الحاجات برجلي، مراتي قالتلي كلم الدكتور أسأله إيه اللي بيحصل، قالي مش إحنا قولنا أن الشخصية موجودة في العقل الباطن؟ طمنهم في البيت وقولهم أنا عندي وليد سلطان ساعة يروح وساعة يجي.
