ابوك لو عايش قوم خده فى حضنك وبوس ايده ولو ميت اترحم عليه.
الخال مش والد والعم كمان .. (ابوك مفيش حد يعرف يسد مكانه)
اوعى تغضب من ابوك لما يقول لك مفيش شغل قبل ما تخلص تعليمك وما ينفعش دلوقتى أو لما يزعقلك عشان بتتأخر برا البيت أو يطلب منك طلب تحس انه تقيل عليك ويتنرفز لما ترفض .. أو لما ميقدرش يواكب تفكيرك أو يقولك كفاية طقم واحد جديد أو لما يهتم بيك زيادة عن اللزوم وقت التعب والمرض وتحس ان اهتمامه بيخنقك عشان لازم تخلص العلاج .. أو لما ياخد قرار خاطئ ويتحمل نتيجته أو يقعد معظم وقته فى الشغل بعيد عن حياتك أو لما تطلب منه حاجة ويقول لك استنى شوية.
أوعى تغضب من أبوك لما يقسى عليك أو يقول لك ماتصاحبش فلان أو يطلب منك تقعد معاه ومتخرجش أو يزعق لك بسبب النور المفتوح عالفاضى او لما يجبلك احسن هدوم ويهمل فى مظهره.
ابوك لو مات هتعرف ان محدش بيحبك قده وانه من اكبر النعم اللى ربنا كان مديهالك وأكرمك بها وانك مكنتش حاسس بها أو بقيمتها.
ابوك لو مات هتتمنى انه يجيلك فى الحلم ومش هاتلاقى وقت تقعد فيه مع نفسك وهاتفهم ان كل كلامه كان صح وهتقعد فى الضلمة عشان تحافظ عالفاتورة.
ابوك لو مات هترمى هدومك الجديدة وتتمنى ان حاجاته القديمة تيجى على مقاسك وهتبخل على نفسك بتمن العلاج عشان عندك اللى اهم من علاجك.
ابوك لو مات هتتمنى ترجع ايامه وتاخد مصروف من ايده وتبوسها وهتعرف انك مش هتقدر توصل لربع حكمته.
ابوك لو مات مش هتقدر تشترى قميص وهتتمنى انك تفضل تنضرب بس تتعلم وانك مش عارف تاخد قرار وهاتلاقى اللى بيطلب منك ومش بيستنى وهتتمنى انك تقعد فى البيت وهتلاقى ناس بتكرمك من اجله مش من اجلك انت.
وصدقنى حضن ابوك مش دلع لانك هتتمناه لما تتحرم منه.
هتفتكر هزار ابوك وبدل ماتضحك هاتبكى من شوقك له.
اوعى تفتكر ان كلمة بابا عيب أو انك كبرت عليها صدقنى هتتمنى تقولها بعد ما يموت.
