فيه إيه فى الجرنان شاغلك كده أوى يا أمينة ؟
عشنا وشفنا يا سى السيد قال على رأى المثل بطلوا ده واسمعوا ده
ماتتكلمى على طول يا ولية وبلاش ألغاز وقولى فيه ايه فى الجرنان؟
بيقولك قال إيه يا السيد فيه بطل كمال أجسام من بلد اسمها مورستان اتجوز عروسة اسمها ابصر ايه
هههههههه الله يحظك يا امينة اسمها كازاخستان لكن المورستان ده شكله كده هيبقى مقر ناس حبايبنا قريب !
بلاش تتريق عليا يا سى السيد ولا اكمنك يعنى معاك اعدادية وانا يادوب ابتدائية؟
طب حقك عليا يا ستى وقوليلى بقى بطل سى كمال الاجسام بتاع كازاخستان اتجوز مين..اكيد نجمة مشهورة زيه.
ياريت مكنش تبقى حاجة غريبة.
اومال اتجوز مين.. واحدة قريبته مثلاً.. طب وماله وهو فيه حاجة بوظت المجتمع غير افتكاسات خطورة جواز الأقارب والكلام الفارغ ده اللى خلى البنات قاعدة مرطرطة من غير جواز والولاد صايعين ع القهاوى؟
ياسى السيد مالك قلبت على عمرو حمزاوى كده يا خويا.. الموضوع مش كده خالص.. البطل ده مش متجوز واحدة ست زينا كده؟
وهو انتى معتبرة نفسك ست يا أمينة؟
اه ياخويا وست الستات كمان بس انت اللى مش شايف ستات فى العالم غير زبيدة وجليلة العوالم بتوعك..لكن على رأى المثل بنت البيت عورة يا سى السيد !
طب لمى لسانك اللى زى المبرد ده يا أمينة بدال ما روحك على امك واخلصى احكي.
البطل ده ياخويا متجوزش انسيه يا سى السيد !
هنرجع بقى للتخاريف القديمة وتقوليلى انه متجوز جنيه والكلام الفارغ ده؟
لا يا خويا ده متجوز دميمة !
دميمة يعنى تقصدى وحشة أوى؟ وماله طيب نصيبه كده، بكرة يخرطها خراط البنات وتبقى زى القمر.. فاكرة شكلك زمان يا امينة كنتى ايه ولا تحبى اجيبلك صورك قبل ما يعدى عليكى خراط البنات؟!
خراط إيه ونجار إيه يا سى السيد بقولك مكتوب انه اتجوز دميمة لا بتاكل ولا بتشرب وبتتحرك بالزمبلك !
ههههههه طب ماتقولى كده م الأول يا امينة قصدك دمية يعنى عروسة لعبة ؟ هى الناس اتجننت ولا إيه؟
لا وكمان عملها فرح كبير وجابلها خاتم ألماظ واشترالها فساتين كتير وكمان اخدها وسافروا يقضوا شهر العسل فى شاطئ المالاديف.. ألا تطلع فين المالاديف دى يا سى السيد؟
استنى بس بلا مالاديف بلا جمصة بتقولى اتجوز عروسة لعبة وسافر معاها شهر العسل، يا مثبت العقل والدين يارب!
المشكلة مش فى كده يا سى السيد المشكلة انه كاتب على الفيس بوك انهم خلاص انفصلوا علشان فيه بينهم مشاكل، ازاى بس دول لسه عرسان ويادوب راجعين من شهر العسل اللى قضوه فى المالاديف !
لاقيها مابتسمعش الكلام ولا قاعدة اليوم كله قدام الموبايل ومبتعملوش الأكل اللى بيحبه !
وليه ميكونش هو اللى منكد عليها ومقضى اليوم كله فى الشغل بالنهار ومع أصحابه بالليل وسايبها زيها زى أى كنبة أو كرسى فى البيت؟ ولما يسافر بيطلع مع أصحابه وعمره ما فكر ياخدها فسحة ولا يسفرها معاه؟! وتلاقيه حتى عمره ماقالها هابى فالانتاين فى عيد الحب!
بالمناسبة صحيح هابى فالانتين يا أمينة واعملى حسابك هاخدك معايا الرحلة الجاية يا أمينة ولا تزعلى!
بس اوعى تكون ناوى تسفرنى كازاخستان يا سى السيد؟
لا يا أمينة انتى مش اقل من العروسة الدمية..أنا هاخدك الملاديف بذات نفسها نعمل شهر عسل جديد هناك !
