كشفت الفنانة هنا الزاهد، تفاصيل مشاركتها في مسلسل "سيب وأنا سيب"، الذي تم عرضه مؤخرا عبر منصة "شاهد"، كما كشفت كواليس العمل مع الفنان أحمد السعدني، وذلك خلال استضافتها في برنامج "الحكاية" الذي يقدمه الإعلامي عمرو أديب، عبر شاشة MBc مصر.
وقالت هنا الزاهد: "لما قريت مسلسل سيب وأنا أسيب عجبني جدا وعجبني دور نبيلة أوي، وأنا حبيت كل الكاست وباين في المسلسل إن إحنا بنحب بعض وسافرنا مع بعض".
واستكملت هنا: "أحمد السعدني كنت فكراه في الأول رخم وكنت بشوفه في الجيم كان بيسلم عليا بطريقة غريبة كده وأرجع أقول هو دمه تقيل ولا إيه، وفي الآخر قالي أنا بحبك جدا كممثلة بس كنت مكسوف، طلع بيتكسف أوي".
وتحدثت هنا الزاهد عن مشهد ضرب أحمد السعدني لها في مسلسل "سيب وأنا أسيب" قائلةً: "في مشهد من كتر ما إحنا واخدين على بعض كنا قاعدين أنا وهو في البلكونة وكنا بناكل لبان وهو ضربني بجد قولتله في المشهد أنت غبي؟ وكنت فاكراهم هيوقفوا تصوير بس لقيتهم كملوا وكملناه عادي، بس اتضايقت منه بعد المشهد لأني عاملة عملية فيها وهو وجعني بجد".
وعن مشهد سبّ أحمد السعدني في مسلسل "سيب وأنا أسيب"، مما جعلهما يتعرضوا للعديد من الانتقادات عبر السوشيال ميديا، قالت هنا الزاهد: "مشهد الشتيمة ده كان المفروض المخرج ياخده من كادر واسع فـ مكنش هيبان حركة الشفايف والناس مكنتش هتفهمها، وأنا استغربت جدا وقولت أكيد غلطة مونتاج وزعلت من السعدني وكلمته قولتله أنت بجد شتمت كده؟ قالي معرفش أنا قولت هياخدوه من كادر واسع".
اقرأ أيضا | هنا الزاهد تنفي شائعات الانفصال عن أحمد فهمي: فخورة بنجاحك في سفاح الجيزة
