مفيش مفتاح؟
ولا شراعة تدخل ايد
تونس خدي
مع ايدي اللي راكنة عليه
مجاش جوابات؟
ولا رنة جرس ع الباب
تصحيني غير الفواتير
مفيش حاجه بتلزمني ما بتسيبنيش؟
عودين كبريت
ألف عيالي ف سيجارتي
عشان صدري ما يتعبنيش
يا ريت ف الدرج حبة ريش
أطير وأدخل ف جيب جدي
بريحة الغيط
هاعوز أبرة وبكرة خيط
الضم بيها اشيائي
أزايز زيت علب صلصة
وبايظ ربعها الباقي
شوية بن للدوخة اللي ماسكاني
تظبط يومي بالنيه
لمونة أقرشها تفتح نفسي للدنيا
بطاطي ف راسي من ساعة
ما زاد الحمل ع الطوابير
ها جيب طباشير
وألون شكلي ع الحيطه
ومش هاسجد لقرص الخوف
لا ها نكون للزمن صورة
ولا وقفنا على الأعتاب
مفيش بواب؟
يطلعنا مع الناس اللي ساكنين فوق
مفيش وردة ترد الروح
يكون لونها ماهوش أحمر
ولا حيطة هتتمحر
وتطرطش برزق عيال
مفيش شيال!
لدعوة ترج من جوعها ال
سبع سماوات
فتطعمنا السما بخيرها
اللي مليان ضي
بشارة م المسيح الحي
لجنه جديده تفاحها حلال ف حلال
مفيش شيال!
بيبان الأوضة مقفولة
مفيش مفتاح؟؟
