«كلام في الخيال» قصيدة للشاعر سامح هريدي

 

الشمس لما اطمنت

نامت فى حضن الليل

وسلمت القمر..

 مفتاح ملامح حلمها..

عشان بشوق يرسم لها..

لوحة حنين ..

عنوانها أهلاً بالنهار..

والفجر يتسحب عشان

 يفرش لها..

سجادة الضوء..

اللى عليها هايمُر بهدوء

موكب سعادة حسنها..

كل النجوم مليانه شوق

تركت مواقعها عشان .. تنظر لها

يا بختها

كل الحاجات اللي خلاص مكتوب لها

 تحضن عينيها النعسانين..

كل البلابل في الطابور متجمعين

متهيأين

لعزف أنشودة لقاء المغرمين..

وأنا قلبي واقف فى انتظار..

لحظة ظهور

بدر البدور..

بتهل فايهل الضيى ويفج نور..

شدة جمالها عامله للكل ارتباك

حاله قلق بين الزهور

حاله فزع وسط الطيور

حاله لفقدان التوازن للبشر وللجبال

مين اللي قال..

( الصمت في حرم الجمال جمال)

ده كلام يا عالم فى الخيال

م أهو كل شئ شافها نطق

سبح بحمد المولي قال

سبحانه من سوى الجمال

في صورة أروع م الخيال

ياه ع الدلال

اللي بيخطف روحي مني

ويخلي حالي يا خلق حال

البحر تاية م الشطوط

أو عقد مفروط م الخيوط

خايف يدق القلب ل يُرج البيوت

الدنيا بيسودها السكوت

من صدمة النظرة التي

 أدات في لمحه لانهيار جبل الصمود..

التوتة واقفه بترتجف

كالعاده خايفه يكون لُقانا عندها

عماله بترتب في أورقها عشان

تفرد علينا ضلها

وقت اللُقا

كل الفروع متشوقه

تحضان جذورها  الطيبه ..

تعزف بخطوتها اللي أشبه بالكامنجه

 ف الأرض ترقص م السعاده

وتغني وتقول مشتاقين.

الميه تصرخ عطشانين لكفوف إيديها..

فا البحر لية غيران بقى...

عمال يشيل في الموج

 ويرزع في الصخور..

والريح تهدي فيه

وهوه يثور ويعلي من الغضب

 بلقاه يفور

 ويهيج ويعمل دوامات..

وبنظره واحده منها

 بلقاه بيهدى ويبتسم

 ويلم حوالينا الطيور

 ويغنوا أحلى الأغنيات..

والريح تهل بأحلى نسمات الزهور

وتعطر الجو اللي مليان بالمحبه

بالفل حبه

والمسك حبه

والساعه بتخاف م المرور فبتستخبى..

الورد فتح م الخجل صبح

ولملم نفسه تاني من الكسوف

لاقيته بيراعي الظروف

من بعيد واقف يشوف

ازاي بتقدر يعني حبات الندى

 تكتب تحيه واعتراف..

 على كل أوراق الشجر..

بِإن أحلى ما في الحياه

لُقى الأحبه

من بعد طول بُعد وسفر..