فوجئت بجدي لأمي محمود بك سامي صاغ اوغلو ، وهو من الشراكسة ، واقفا أمامي بملابسه البنية الكاملة وحذائه اللامع وساعته الذهب ذات السلسلة، وعجبا أن ملابسه وهيئته مازلت تتماشي مع خطوط الأزياء الحديثة،
سألني جدي: انت يا ولد يا خنزقور إيه اللي في جيب بنطلونك ده علبة دخان دي ولا أيه ، يا مفيدة (جدتي) حضري الكورباج السوداني علشان نشوف مين اللي جاب علبة الدخان دي للولد الخرسيس ده.
العبد لله: الهدوء حضرتك .. السكينة معاليك، أنا مبشربش سجاير خالص ولا بحب ريحتها ، اللي في جيبي موبيل، ياجدي مفيش والله سجاير.
جدي: بطل الطريقة دي معايا، انت عارفني كويس، مبشربش سجاير، هي السجاير بتتشرب دي بتتدخن، وإزاي في جيبك اتومبيل، شايل عربية بكار في جيبك، شيبذوك أدب يوك (شتيمة بالتركي بس مَش قليلة أدب).
العبد لله: أسف يا جدي أدي كل اللي في جيبي تليفون يعني (مسرة) بلغة زمان، وفواتير بقالة، ومشتريات من السوبر ماركت.
جدي: انت عارف أنا بفهم لغات كويس، برطن وأكتب ٦ لغات، عربي وفرنسي وإنجليزي، وتركي، وجريجي، وشوية أرمني، وعارف يعني أيه تليفون، بس ليه شايل تليفون لعبة في جيبك، ولا صحيح، حتشيل التليفون بالسلك من الجدار ازاي، وريني الفواتير يا خنزقور.
العبد لله: بلاش يا جدي، أحسن تزعل، الأسعار بقت نار.
جدي: فعلا من بعد الحرب الدنيا بقت بالغلا والكوي.
العبد لله: طيب اقرأ لك أحسن علشان مَش معاك نظارة القراءة، أولا كرتونة بيض 125 جنيه
جدي: أيه ده انت اشتريت كام بيضه يا نبيه، كنت حتبيعهم تاني ولا ده بيض تماسيح ده ولا ايه، وبعدين تعال هنا بتشتري أساسا بيض ليه، هو انت ليه مَش بتربي دواجن زي كل المصريين تاكل منها وتاخد إنتاجها، وبواقي الأكل اللي عندك تديه لهم، يعني كله فوايد، مَش تروح تشتري من حد، متعرفش هو أكل الفراخ أيه، اللي بعده.
العبد لله: بص ياجدي، اللي انت بتتكلم عليه ده مبقاش موجود خالص، مفيش حد بيربي في البيوت من زمن إلا فيما ندر، احنا في سنة 2023 م، والبيضة بقت بأكتر من أربعة جنيه، ايامكم ال ١٠٠ بيضة كانوا بجنيه، تعال اخدك لفة في القاهرة واتكلم معاك وتشوف وصلنا لإيه دلوقتي.
نزل جدي معي وهو مذهولا.
جدي: كل الحاجات المتعلقة في المحلات دي إنتاج مصري حاجة تفرح
العبدلله: كل الحاجات دي مستوردة، احنا مَش بننتج زي زمان يا جدي، حتي القطن مبقاش زي الأول.
جدي: طيب والجنيه الورق يجيب كام جنيه دهب لسه ب ٩٧.٥ قرش صاغ ولا رخص ولا زاد.
العبدلله : الجنيه الدهب بقى هو الأغلى يا جدي تقريبا والله أعلم ، الجنيه الدهب ب 16000 جنيه ورق .
جدي: وانت مبسوطين كده، كل الناس دي علي القهاوي الصبح، وفرحانين ان فلوسكم بقت تراب، هي الحتة دي اسمها ايه
العبد لله : ده طريق صلاح سالم، وده جامع الشرطة، ودي مدافن الغفير علي اليمين .
جدي باكيا: اركن علي اليمين، أنا عارف مكان المقبرة بتاعتي كويس، جتكم القرف، ناس كساله، عايشه عواله، عايزين تقعدوا وحد يزغطكم زي البط، عايزين تكسبوا من غير ما تتعبوا، اركن بسرعة والا .....
بدء جدي يهزني بشدة حتي أتوقف ليترك السيارة، وقبل أن أتوقف، وجدت زوجتي واقفة أمامي توقظني من نومي وتنهي حلمي، فالساعة الآن العاشرة صباحا.
