«الحلوة مش للهوى» قصيدة للشاعرة سعاد سعد
تاه المدار م القمر
وسفينته ما قَبت
الحلوة مش للهوى
في العمر ما حبت
الليل حاضن في نهار
بيقوله قوم غيتني
الحلم راح انهار
حتى القمر فاتني
الليل حاضن في نهار
بيقوله ما تسبنيش
الظلم أكل الحشا
والكون ما سايعنيش
داعيين عليك الغلابه
بيقولوا شُق نعيش
غاب النهار وضهره
مودع الحرافيش
ظلمك وجع في الحشا
مُرك زاد التجاعيد
والضرب من غير خشا
ذنبي عملتك سيد
الليل حاضن في نهار
فاكره معداوي
جفت كتير أنهار
رطب بقى وداوي
الخير مجافي الدور
شَقشَق بحبة نور
طبطب بقى ع الوجع
لعطشنا ليه غاوي
بلاش لقوتنا تجور
روحي عليها الدور
لو كنت ثورت في يوم
حقك على عيني
احكم بقى يا قاضي
على لقمة القاضي
مش كنا متواعدين
بات الأذان فاضي
تاه المدار م القمر
وسفينته ما قبت
الحلوة مش للهوى
في العمر ما حبت
خاصم ضُحاها النور
نهارها حاضنه الويل
فاتحة الهاويس للضيا
وشباكها ما عبت
الليل حاضن في نهار
بيقوله عَاديني
م الظلم بينا تار
خدني وهَديني
