لأ..
دى مش رشاقة
ولا هى حيوية
ولا هو إقبال على الحياة
بصحى بدرى جدا
وبنام متأخر
وماعرفش حاجة اسمها القيلولة
ودى برضو مش بطولة
والخمسين إيد
والعشر عيون
والتلتميت شخصية
والسخرية من كل شىء
اوعى تعتبرها شىء خارق
كل دى حاجات بخترعها
عشان الدنيا تمشى
بأقل قدر من الخساير
مش مهتم بنفسى خالص
عمرى ما فكرت أصبغ شعرى
أو أطلب أوبر وانا رايح مشوار
أو اشترى لبس إلا للضرورة القصوى
أو أوعد اصحابى على سهرة فى كافيه
وبرضو ما فكرتش آخد هدنة
واقعد لوحدى فى مكان هادى أتأمل تصاريف الزمن
أو أعمل زى الشعرا المهمين
إللى ليهم طقوس فى الكتابة
ساعات بكتب وأنا ماشى
الوقت ضيق جدا
مابيسمحش حتى إنى أقول لحد شكراً
أو يمكن بقولها بطريقة تانية
جربوا كده
واحذفوا صورتى من الألبوم
وشوفوا: هل فى حاجة ح تختلف؟
الله يخليكم
هدومى كلها اتقطعت
بلاش كل واحد يشدنى من حتة
كان نفسى أعيش طفولة سعيدة فى هذا السن
كان نفسى عضمى يطاوعنى
ويبطل يئن
كان نفسى فى أى حاجة حلوة مسكرة
بس الحياة بتضن
على فكرة
دى مش شكوى
ولا شعور بالظلم
بالعكس أنا خدت أكتر من حقى
وعشت حياة ماكونتش أحلم بيها
دلوقتى ماعنديش رغبة فى إن حد يطبطب عليا
ولا بقى عندى حنين للماضى
الماضى زى الحاضر يغم
مافيهش حاجة تستحق الحنين
غير بس هو حنان الأم
أنا بعمل كل حاجة بسرعة
بس بإتقان والله وعلى أد ماقدر
مدفوع بالمسئولية والاحتياج
كأنى ترس اترشق
فى آلة الإنتاج
فين المتعة بقى
حد سمع عن مريض بيستمتع
بجرعات العلاج؟
يسرى حسان يكتب: اعملوا كل شىء بهدوء
