مصطفى كامل: ماعنديش قائمة ولن أقبل بالفساد مجددًا ولدي أحلام كثيرة لتحقيقها

كشف الفنان مصطفى كامل نقيب المهن الموسيقية، أنه تقدم بأوراق ترشحه على مقعد نقيب المهن الموسيقية اليوم الأحد، دون قائمة، مؤكدًا أنه لن يقبل بالفساد مجددًا، وأن لديه أحلام كثيرة سيحققها إذا كتب الله له ولاية الأمر.

وقال مصطفى كامل في لايف عبر صفحته بموقع "فيس بوك"، من داخل نقابة المهن الموسيقية بعد تقدمه بأوراق ترشحه على مقعد النقيب: "لكل زملائي المرشحين على منصب النقيب العام أو عضو مجلس الإدارة، أقسم بالله وبكتاب الله ما ليا قائمة، المرشحين كلهم أفضل من بعض واللي هييجي على الترابيزة دي هنشتغل مع بعض ولن أقبل بحد ينتفع من وراء الموسيقيين، واللي مفكر أنه يسرق يقعد في بيتهم واللي ناوي ياخد حق اليتامى من القديم والجديد هتكون سنينه سودة".

وأضاف مصطفى كامل: "عاوزين ناس شرفاء وأمناء على حقوق الغلابة، ومش بحب الفساد ولا أنا راجل فاسد ولا هقبل بحد فاسد معايا، وأحلامي الفترة الجاية هتكون أعلى على المستوى الإداري والخدمات والموظفين والواجهات المرشحة، وبحق كتاب الله ما ليا قائمة، ومش هوصي حد على حد وكله بمجهوده وعلاقته، ومش هقدر أمسك غير كتاب ربنا وماليش قايمة وزملائكم مطروحين عليكم وتوكلوا على الله وأنا مع الله وهفضل مع الله".

وأردف مصطفى كامل: "مش هقبل كلام وحش على النقابة، ومفيش نقابة محترمة تسمح إن حد فيها يكتب عنها نقابة الفساد والعار، إزاي تكتب على بيتك كده ولا نفسك، لو شفت عار تقدم لرئيس مجلس الإدارة ولما ما يجيش حقك اعمل اللي أنت عاوزه، لكن ليه تكون قاعد فاضي وتكتب نقابة العار، ولاحقا لو ربنا ولاني الأمر ده مش هيكون مقبول، وبقرارات مجلس الدولة هناخد قرارات وهنرفع قضايا في المحاكم لأنها جريمة والدولة تجرم السب والقذف إلكترونيا".

موعد انتخابات نقابة الموسيقيين:

وستجرى انتخابات نقابة المهن الموسيقية، اعتبارا من الساعة التاسعة صباحا وحتى الساعة الخامسة مساء، يوم 1 أغسطس المقبل، في نادى نقابة المهن التمثيلية شارع البحر الأعظم الجيزة، وبالمقرات الفرعية للنقابة في محافظات: (الإسكندرية: بنادى محافظة الإسكندرية - الشاطبى)، (الدقهلية: قاعة ميامى - بطلخا - المنصورة)، (طنطا، كفر الشيخ: بمقر النقابة بطنطا)، (بورسعيد، الإسماعيلية، السويس: بمقر النقابة ببورسعيد)، (قنا، الأقصر، الغردقة: بمقر النقابة بالأقصر)، (دمنهور، المحلة، شبين الكوم، بنها، دمياط ،الشرقية، بني سويف، المنيا، سوهاج، أسيوط، أسوان: فى مقار النقابات الفرعية).

وكانت فتحت نقابة المهن الموسيقية، باب التنازلات للمرشحين بداية من يوم الأحد 18 يونيو، وحتى الثلاثاء 20 يونيو الجاري، على أن يتم فتح باب الطعون من يوم الأحد 25 يونيو وحتى الثلاثاء 27 يونيو.