قال الرئيس عبدالفتاح السيسي، إن سياسة مصر تتسم بالاعتدال والتوازن والانظباط الشديد تجاه الجميع في الداخل والخارج، مضيفاً: "عاوز أقول بتابع مواقع التواصل وبشوف إنه ساعات حماس زيادة أو حتى أقول تجاوزات في الكلام مش بتكلم عن موضوعات محلية بتتكلم عن موضوعات خاصة بعلاقتنا مع أشقائنا وده أمر ننتبه إليه كويس".
وأضاف الرئيس السيسي خلال افتتاح المرحلة الثانية لمصنع سايلو فودز للصناعات الغذائية بمدينة السادات في محافظة المنوفية: "أرجو إننا نخلي بالنا ومدى فهمنا ومدى تقديرنا للعلاقات مع الأشقاء وبالتالي لما يبقى فيه موضوع يتم تداوله بدون أساس وملوش خلفية بنقعد ونتكلم في أمور قد لا يكون لها أساس من الصحة طيب ليه؟.. هنمشى وراء بعض المواقع المغرضة اللى عاوزة تعمل فتنة بينا وبين الأشقاء أقل حاجة نعملها نسكت إن مكوناش نقول كلام طيب نسكت.. حتى وسائل إعلامنا اللى احنا مش بندخل فيها..احنا مش بنكتب إلا دايما لصالح تحسين ودعم العلاقات مش العكس.. علاقتنا طيبة بالجميع وده منهج ماشين بيه مش النهاردة ومنذ توليت المسئولية ده مسار بننتهجه كدولة حتى في الأزمات والخلافات الكبيرة".
وتابع الرئيس السيسي: "احنا دايماً مفيش تصريحات سلبية ومنظبطة جدًا وميصحش نسئ لأشقائنا ومننساش وقفة أشقاءنا معانا.. لو فيه أزمة أنا أطول لساني وأقول كلام مش مظبوط ده كلام لا يليق أبدا ..فين لا تنسوا الفضل بينكم.. لما نعمل كده كمواقع تواصل.. وبعض المقالات اللى بشوفها مع أشقائنا في المملكة العربية السعودية أو أي دولة أخرى.. لا لا احنا حريصين وده توجه دولة وأرجو كمواطنين ننتبه إن احنا لا ننساق وراء مواقع تريد الفتنة بيننا وعلاقتنا طيبة بالجميع وحتى فى أصعب الظروف.. ومش عاوز أقول أسماء دول لأن الأمور كلها تجاوزناها وكنت عارف كده ولو كان فيه خلاف مع دولة شقيقة خلال السنين اللى فاتت، كنت عارف إننا هنتجاوزها، حتى الأزمة مع إثيوبيا في سد النهضة بتلاحظوا إننا مابنقولش كلمة واحدة تسيئ".
