بعد أن انفردت بوابة أخبار اليوم بتسليط الضوء على حكاية نورا الملقبة بام فارس أول سيده تحترف مهنة الكهرباء ، تهافتت عليها القنوات الفضائية والمواقع الإخبارية، حيث روت الأسطى نورا، تفاصيل عملها في مهنة الكهرباء، مشيرة إلى أنها لم تعمل من قبل هذه المهنة، لكن ظروف مرض زوجها وجلوسه بالمنزل وعدم وجود المال لإطعام أطفال كان سببا في دخولها المهنة.
أضافت خلال لقائها مع الفنانة هالة فاخر، عبر برنامج «حكاية مصرية»، المذاع على قناة صدى البلد، أن زوجها كان يعمل كهربائي، إلا أن ظروف مرضه كانت أقوى منه وجعلته طريح الفراش، قائلة: «المرض جاله في ذراعه وفي التهاب أعصاب شديد ومبقاش قادر يحركه وده كان مصدر رزقنا إحنا والعيال ومبقاش في مجال زرق تاني وده اللي جعلني اتعلم المهنة واشتغل مكانه».
وأشارت إلى أنها تبدأ يومها في تمام الساعة السادسة صباحا، قائلة: «أول ما اشتغلت كنت بخاف من الكهرباء وبدأت أتعلمها كويس، علشان خاطر جوزي وبيتي وأكل عيالي، أنا عندي طفلين فارس وريتاج ولازم يتصرف عليهم ومفيش مصدر رزق غير كده».
وتابعت الأسطى نورا، عبر برنامج «حكاية مصرية»، المذاع على قناة صدى البلد : «اشتغلت في حضانة وكنت بأخذ مبلغ 600 جنيه في الشهر وده مش هيعمل حاجة في الظروف دي، وأنا لو جالي شغل بـ 10 جنيهات بعمله، وكمان القرش اللي مش هتعب فيه مش عايزاه، وأنا اشتغلت علشان محدش سواء من أهلي أو من أهلي جوزي ساعدونا، واشتغلت علشان خاطر عيالي».
وأضافت خلال لقائه بقناة صدي البلد: «أنا يوميا على الله بشتغل، وكمان بركز في شغلي علشان الغلطة في شغل الكهرباء بموتة، ولو مش واثقة من نفسي في الشغل مش هخرج وأنزل أشتغل، وأوقات كثيرة بنام بهدومي من التعب، وجوزي يبقى حاسس بده، لكن أنا دائما بقول أنا مش تعبانة علشان خاطر ولادي».
اقرأ أيضًا| حكايات| الأسطى «نورا».. كهربائية من «ضلمة» حياتها «تنور» حياة الزبائن
