كل عام وانت بخير
الليلة آخر يوم فى عام مضى بكل افراحه واتراحه ومشاكله ومتاعبه
وغدا أول يوم فى أول أسبوع فى أول شهر فى العام الجديد
افرح وإمرح والعب واستمتع دون مجون أو جنون أو انفلات أو خروج عن المألوف المتعارف عليه من القواعد العامة للقيم والمثل والأخلاق القويمة والسليمة والمحترمة.
ابدأ عامك الجديد بروح جديدة وكأنك تعيش لأول مرة وكأنك لسة مولود
وكُن كريما منفقا كما أمرك الله بالكلمة الطيبة والبسمة الصافية ومساعدة الآخرين وجبر الخواطر وتعليم القرآن ونشر العلم والإصلاح بين الناس والتغافل عن أخطاء الغير والتسامح مع ذلاتهم وبلاويهم قدر استطاعتك والدعاء وإن كان بظهر الغيب .. سيدنا الإمام الشافعى كان يقول: «سيروا إلى الله عرجى ومكاسير ، ولا تنتظروا الصحة ، فإن انتظار الصحة بطالة» .. يعنى امش فى طريق ربنا حتى لو ماشى مدغدغ و ماشى على سطر و سايب عشرة .. خليك على طريق ربنا وكمّل فى السكة حتى لو زاحف .. بس على الطريق ..ولو مقصر فى الصلاة ؟ كمّل رغم التقصير .. لكن إوعى تقطعها ..إياك و أن تخلع سُترة العبادة وإن كانت مُرَقعة .. يعنى إوعى ترمى توب العبادة حتى لو مقطع لان ربنا شايفك و سامعك و عالم بحالك .. خلّى الباب بينك وبينه مفتوحا دايماً ..وابعد عن الناس اللى بتحاول تشغلك وتلهيك على طريقة بص العصفورة ويخطفوا سعادتك وراحة بالك ويقلقوك ويعصبوك ويحزنوك ويزعلوك .. وفى الوقت اللى هاتبص فيه للعصفورة هاتلاقيهم سرقوك وخطفوا سعادتك وهربوا .. إوعى تبص للعصفورة بتاعتهم لأنهم حرامية عايزين يشغلوك
اشغل قلبك ونفسك وعقلك وروحك بالله سبحانه وتعالي وامض فى حياتك بكل هدوء وسكينة وسلام وابتعد عن حرامية الطاقة الايجابية وخليها على الله وقل دائما « حسبنا الله ونعم الوكيل نعم المولى ونعم النصير ونفوض أمرنا إلى الله إن الله بصير بالعباد.
