«عندك ولد الله يكون فى عونك دى تربية الأولاد اصعب من البنات».. جملة اتعودنا نسمعها دائما مع الأم اللى عندها أولاد، ودى بتخلى عندها شعور طول الوقت بالخوف، لأنها تتمنى أن ابنها يطلع راجل مش «متدلع وابن امه»، وكانت تقع فى حيرة الحنية على ابنها والشدة عشان يتربى وفى اخر الدراسات أثبتت أن الاحترام بين الولد ومامته هى حلقة الوصل فى انشاء رجل بمعنى الكلمة.
لما تبصى لابنك طول الوقت بصه إنه مش عاجبك، ولما تقللى منه ولما تغلطى فيه، وتشتميه، ولما متحترميش إنه انسان مكرم من اللى خلقه.. يبقى إنتى خلتيه انسان «مُهزأ»، اه للاسف.. غير محترم وشايف نفسه قليل وهيتعرض لـ «التنمر» وعدم احترام المحيطين كبار أو صغيرين وهو مش هيقدر يرد عن نفسه لأنه متعود على التهزيء، ولما يتعلم يرد هتلاقيه بيقلل من الآخر علشان بس يقدر يشوف نفسه.
إقرأ أيضًا
دراسة: التنمر الإلكتروني له تأثير أسوأ على ضحاياه المراهقين
نصيحة «احترمى ابنك» بصى له باحترام وتقدير للنعمة اللى ربنا آمنك عليها متقوليش له كلمة مهينة كل ده يعنى تربية، بحترم ابنى يعنى بعلمه الاحترام.. بحترم ابنى يعنى بخليه عزيز، لما بحترم ابنى بيحس بالقيمة، ولما بحترم ابنى بيحترم نفسه، ولما بحترم ابنى بيبقى انسان واثق فى نفسه.. احترامك لابنك أهم خطوة فى بناء «رجُلك الصغير».
